Jyl basynan beri bala týýyna, kútimine baılanysty tólengen járdemaqynyń jalpy somasy 507 mlrd teńgege jýyqtaǵan. Onyń ishinde tek bala týǵanda beriletin járdemaqyǵa respýblıkalyq bıýdjetten 36,4 mlrd teńge qaralyp, 201,7 myń azamatqa tıgen.
Járdemaqynyń osy túrine bala týǵan, asyrap alǵan, qamqorlyqqa alǵan balalary bar el azamattary, qandastar, elde turaqtap qalǵan sheteldikter úmitker bola alady. Bala týýyna, bala kútimine arnalǵan memlekettik járdemaqylardyń mólsheri respýblıkalyq bıýdjet týraly zańmen tıisti qarjy jylyna bekitilgen aılyq eseptik kórsetkishke (AEK) baılanysty belgilenedi. Jyl basynda memlekettik járdemaqylardyń mólsheri 6,5%-ǵa ındekstelgen.
Bala týǵanda beriletin járdemaqynyń bıylǵy mólsheri:
– birinshi, ekinshi, úshinshi balaǵa – 38,0 AEK nemese 149 416 teńge;
– tórtinshi, odan keıingi balalarǵa – 63,0 AEK nemese 247 716 teńge.
Bala 1,5 jasqa tolǵanǵa deıin kútimine baılanysty beriletin járdemaqy aı saıyn kelesideı mólsherde tólenedi:
– birinshi balaǵa – 5,76 AEK nemese 22 648 teńge;
– ekinshi balaǵa – 6,81 AEK nemese 26 777 teńge;
– úshinshi balaǵa – 7,85 AEK nemese 30 866 teńge;
– tórtinshi, odan keıingi balalarǵa – 8,90 AEK nemese 34 995 teńge.
Budan basqa, jumys isteıtin azamattarǵa júktilikke, bosanýǵa, jańa týǵan balany asyrap alýǵa baılanysty kirisinen aıyrylǵan jaǵdaıda MÁSQ-tan tólenetin áleýmettik tólem júktiligi, bosanýy boıynsha berilgen demalystyń barlyq kúnderine taǵaıyndalady. Tólem mólsheri júktiligi, bosanýy boıynsha ýaqytsha eńbekke jaramsyzdyq paraǵy berilgenge deıingi keıingi 12 aı ishinde MÁSQ-ǵa áleýmettik aýdarymdar júrgizilgen ortasha aılyq kiriske, eńbekke jaramsyzdyq kúnderiniń sanyna baılanysty bolady.
Atalǵan birjolǵy tólem jyl basynan beri 133,6 myń adamǵa berilgen. Jalpy somasy – 190,7 mlrd teńge. Shilde aıynda tólemniń osy túri 24 mlrd teńge somasyna 21,8 myń adamǵa tıgen. Jyl basynan beri taǵaıyndalǵan tólemniń ortasha mólsheri 1 523 093 teńgeniń shamasynda.