Eýroodaqtyń keńeıý máseleleri jónindegi komıssary Marta Kos Chernogorııa 2028 jyly EO-nyń jańa múshesi atanýy yqtımal ekenin málimdedi, dep habarlaıdy Egemen.kz.
Onyń sózinshe, eldiń odaqqa kirýine qatysty tehnıkalyq kelissózder kelesi jyly aıaqtalady. Al sońǵy kelisimdi maquldaý prosesi bir-eki jylǵa sozylýy múmkin.
«Eger barlyq rásimder josparǵa saı júrse, 2028 jyly Chernogorııa Eýroodaqtyń 28-múshesi bola alady», dedi Marta Kos.
Aıta keteıik, bul qadam qazaqstandyq saıahatshylar úshin birqatar ózgeris ákelýi yqtımal. Qazirgi tańda Qazaqstan azamattary Chernogorııaǵa 30 kúnge deıin vızasyz bara alady. Vızasyz rejım ádette kóktemnen kúzdiń sońyna deıin qoldanylady (bıylǵy merzim – 1 naýryzdan 1 qarashaǵa deıin).
Sonymen qatar, elge kelgen árbir týrıst alǵashqy táýlikte ýaqytsha tirkeýden ótýge mindetti. Bul rásim týrıstik kompanııalarda, qonaqúılerde nemese jergilikti polısııa bólimshesinde júrgiziledi.
Qazaqstannan Chernogorııaǵa barý úshin tikeleı áýe reısteri de qoljetimdi. Air Astana kompanııasy Almaty men Astanadan Podgorısaǵa tikeleı ushýlardy júzege asyrady.
Alaıda Chernogorııa EO quramyna kirgen jaǵdaıda, qazaqstandyqtar úshin shengen vızasy qajet bolady. Onyń quny eresekterge – 90 eýro, al 6-12 jas aralyǵyndaǵy balalarǵa – 45 eýro. Degenmen, Eýrokomıssııa Qazaqstan men Eýroodaq arasyndaǵy vızalyq tártipti jeńildetý boıynsha jospar bar ekenin atap ótti.
Esterińizge sala keteıik, Chernogorııa 2010 jyldan beri EO-ǵa kirýge resmı kandıdat sanalady. Sondaı-aq Albanııa, Bosnııa jáne Gersegovına, Soltústik Makedonııa, Serbııa jáne Kosovo da odaqqa múshe bolýdy kózdep otyr. (Qazaqstan Kosovony jeke memleket retinde emes, Serbııanyń bóligi retinde qarastyrady).