Jańa 2025-2026 oqý jyly qarsańynda Jetisý oblysynda birqatar bilim nysandary paıdalanýǵa berildi. «Keleshek mektebi» jobasy aıasynda Alakól aýdany Dostyq aýylynda 600 oryndyq, Panfılov aýdany Lesnovka aýylynda 300 oryndyq jańa mektep ashyldy. Jyl sońyna deıin Aqsý men Kerbulaq aýdandarynda taǵy eki mektep qoldanysqa beriledi. Sonymen birge óńirde segiz bilim nysany kúrdeli jóndeýden ótýde, onyń altaýy bıyl aıaqtalady, dep habarlaıdy Egemen.kz.
Oblystyq bilim basqarmasynyń málimetinshe, jańa oqý jylyna daıyndyq barysynda jylý maýsymyna qajetti otyn jetkizilip, mektepterdiń materıaldyq-tehnıkalyq bazasy nyǵaıtylǵan. Jyl sońyna deıin 58 mekteptiń sport zaly men ashanasy jańaryp, 70 pán kabıneti satyp alynady.
Bıyl áleýmettik qoldaý sharalaryna da erekshe mán berilýde. 25 myńnan astam áleýmettik jaǵdaıy tómen otbasy balalaryna mektep formasy men keńse taýarlaryn alýǵa 1,1 mlrd teńge bólinip, qarjy ata-analardyń esepshottaryna aýdaryldy. Sondaı-aq bastaýysh jáne áleýmettik osal otbasy balalary tegin ystyq tamaqpen qamtylady.
Oqýshylardyń qaýipsizdigin qamtamasyz etý úshin bıyl oblysqa qosymsha segiz avtobýs alynǵan. Qazirgi tańda 87 eldi mekennen 2 myńnan astam bala mektepke tasymaldanady.
Jańa oqý jylynda Jetisý oblysynda oqýshylar sany 131 myńnan assa, onyń ishinde 13 myńnan astamy birinshi synypqa barady. Al oblys kolledjderine 4,5 myń stýdent qabyldanady.