Astanada álemdegi bedeldi oqý ornynyń biri – Kardıff ýnıversıtetiniń sheteldegi ári Ortalyq Azııadaǵy alǵashqy halyqaralyq kampýsy ashyldy. Mazmundy is-sharaǵa Qazaqstan men Ulybrıtanııa úkimetiniń ókilderi, sondaı-aq Cardiff University jáne Cardiff University Kazakhstan basshylyǵy qatysty.
Saltanatty ashylý rásiminde Ǵylym jáne joǵary bilim mınıstri Saıasat Nurbek Qazaqstan óńirlik akademııalyq hab retinde damyp kele jatqanyn aıtty.
«Bıyl elimizge 31 myńnan asa sheteldik stýdent keldi. Memleket basshysynyń bastamasymen ǵylym men joǵary bilim salasynda aýqymdy strategııa júzege asyp otyr. Sonyń biri – elimizde jetekshi sheteldik zertteý ýnıversıtet fılıaldarynyń ashylýy. Sońǵy úsh jarym jyldyń ishinde 40-qa jýyq sheteldik joǵary oqý orny elimizge kelse, onyń beseýi iri kampýstaryn ashýǵa sheshim qabyldady», dedi mınıstr.
Sondaı-aq S.Nurbektiń aıtýynsha, búginde elimizdiń ár óńirinde bedeldi sheteldik joǵary oqý oryndarynyń fılıaldary jumys isteı bastady. Árbir seriktespen on jyldyq kelisimshart jasalyp, jergilikti oqý oryndaryn halyqaralyq standarttarǵa saı zertteý ýnıversıtetine aınaldyrý mindeti turǵanyn atap ótti.
Odan keıin sóz alǵan Cardiff University prezıdenti ári vıse-kansleri, professor Vendı Larner Qazaqstanda tarıhı oqý orny fılıalynyń ashylýy zor qurmet ekenin jetkizdi.
«Bul – Cardiff University-niń alǵashqy halyqaralyq kampýsy. Biz akademııalyq turǵydan ozat stýdentterdiń alǵashqy legin qabyldaýdy asyǵa kúttik. Sondaı-aq «Russell Group» quramyndaǵy Qazaqstanda kampýs ashqan alǵashqy ýnıversıtetpiz. Búgingi kampýstyń ashylýy – úlken eńbektiń nátıjesi. Bul rette Qazaqstan Úkimetine bizdiń ortaq maqsatymyzdy júzege asyrýǵa kórsetken qoldaýyna rızashylyǵymdy bildiremin», dedi ol.
Aıta keteıik, Cardiff University halyqaralyq reıtıngte joǵary orynǵa ıe bolǵan. Máselen, «QS World University Rankings» 2026 nusqasynda 181-oryn alsa, «Complete University Guide» 2026 nusqasynda 22-oryndy ıelengen. Zertteýlerdiń 91 paıyzy halyqaralyq deńgeıde úzdik dep tanyǵan (REF 2021). Sonymen birge «Russell Group» músheligi Cardiff University-in Ulybrıtanııadaǵy jetekshi zertteý ýnıversıtetiniń biri retinde bekitken. Osy qyrkúıekten jumysyn bastaǵan ýnıversıtet tórt jyldyq bakalavrıat baǵdarlamasyna stýdentter qabyldaıdy. Oqý tolyq aǵylshynsha. Dáristi Cardiff University jáne Cardiff University Kazakhstan professor-oqytýshylar quramy júrgizedi. Atalǵan oqý orny Ulybrıtanııadaǵy bas ýnıversıtettiń tikeleı basqarýymen jumys istep, brıtandyq sapa standartyn qamtamasyz etedi. Stýdentter kampýstar arasynda akademııalyq mobıldilikke ıe bolady. Zamanaýı jataqhanamen qamtylady.