Qazaqstanda 2025 jyldyń alǵashqy alty aıynda náreste ólimi 22,7 paıyzǵa tómendegen. Bul týraly Premer-Mınıstr Oljas Bektenov AMANAT partııasy fraksııasynyń keńeıtilgen jıynynda málimdedi, dep jazady Egemen.kz.
Úkimet basshysy halyq densaýlyǵyna qatysty oń ózgeristerdi atap ótti.
«Biz 2029 jylǵa qaraı halyqtyń ómir súrý uzaqtyǵyn keminde 77 jasqa jetkizý maqsatyna birtindep jaqyndap kelemiz. О́tken jyldyń qorytyndysy boıynsha ómir súrý uzaqtyǵy alǵash ret 75 jyl 4 aıǵa jetti. Memleket basshysynyń qoldaýy men turaqty nazarynyń arqasynda densaýlyq salasyndaǵy negizgi kórsetkishterdi jaqsartýǵa qol jetkizildi», dedi Oljas Bektenov.
Onyń málimetinshe, «Aýylda densaýlyq saqtaýdy jańǵyrtý» ulttyq jobasy sheńberinde 655 nysannyń 540-y salynyp, 1 mıllıonǵa jýyq aýyl turǵyny alǵashqy medısınalyq qyzmetpen qamtyldy.
Áleýmettik ınfraqurylym da nazardan tys qalǵan joq. Bıyl halyqty tolyq aýyz sýmen qamtý mindeti oryndalmaq. Bul maqsatqa respýblıkalyq bıýdjetten 147 mlrd teńge, al Arnaýly memlekettik qordan 160 mlrd teńgeden astam qarajat bólingen. Jyl sońyna deıin 17 qala men 463 aýylda tıisti jobalar aıaqtalady.
Sonymen qatar, «Aýyl amanaty» baǵdarlamasy aıasynda 25 myń jobaǵa qoldaý kórsetilip, 30 myńǵa jýyq jańa jumys orny ashylady. Al 2026 jylǵa deıin óńirlerdi damytýǵa 5,4 trln teńge bólý josparlanǵan.
Premer-Mınıstrdiń aıtýynsha, óńirlerdiń áleýetin kóterý tek tikeleı qarjylandyrý arqyly emes, damý ınstıtýttarynyń qoldaýymen de júzege asady.
«Mysaly, «Báıterek» holdıngi jyl basynan beri kásipkerlerge 4 trln teńgeden astam qarjylyq qoldaý kórsetti. Bul 8 trln teńge bolatyn jyldyq jospardyń 50 paıyzynan astamyn quraıdy. Onyń shamamen 2 trln teńgesi shaǵyn jáne orta bıznesti damytýǵa, 1,5 trln teńgeden astamy qosalqy shaǵyn kásiporyndarmen tyǵyz baılanys ornatatyn iri bıznesti qoldaýǵa baǵyttaldy», dedi Úkimet basshysy.