Azamattardyń 75,9%-y búgingi tańda elimiz durys baǵytta damyp kele jatyr degen pikirde. Bul nátıje QR Prezıdenti janyndaǵy Qazaqstannyń strategııalyq zertteýler ınstıtýty júrgizgen saýalnama arqyly anyqtalǵan, dep jazady Egemen.kz.
11 shilde - 12 tamyz aralyǵynda ótken saýalnamaǵa elimizdiń 17 oblysynan jáne respýblıkalyq mańyzy bar – Astana, Almaty, Shymkent qalalarynan 18 jastan asqan 8000 azamat qatysqan.
Eń joǵary áleýmettik optımızm deńgeıi 18–29 jas aralyǵyndaǵy jastarǵa tán (84,6%). Jas shamasy ósken saıyn eldiń bolashaǵyna qatysty optımızm birshama tómendegenimen, jetkilikti joǵary deńgeı saqtalǵan (61 jastan joǵary respondentter arasynda – 70,6%). El damýynyń qazirgi baǵytyn qala turǵyndaryna (73,8%) qaraǵanda aýyl turǵyndary (79,3%) anaǵurlym durys dep sanaıtyny belgili boldy.
Eldiń durys baǵytta damyp kele jatqanyn qoldaǵan respondentterdiń basym bóligi qazirdiń ózinde naqty júzege asyrylyp jatqan birqatar mańyzdy reformalardy atap ótken:
Áleýmettik bastamalar:
— Aýyldyq jáne qalalyq mektepterdi salý men jańartý – 38,2%;
— «Ulttyq qor – balalarǵa» baǵdarlamasyn iske asyrý – 29,5%;
— BJZQ-dan qarajattyń bir bóligin sheship alý múmkindigi – 20,1%.
Ekonomıkalyq reformalar:
Avtomagıstralderdi, vokzaldar men áýejaılardy salý jáne jóndeý – 18,4%; Aýyl sharýashylyǵyn damytý – 13,6%; Shaǵyn jáne orta bıznesti qoldaý – 10,3%; Otandyq taýar óndirisiniń artýy – 9,7%.«Zań jáne tártip» qaǵıdatyn jáne «Taza Qazaqstan» jalpyulttyq aksııasyn júzege asyrý:
Turmystyq zorlyq-zombylyqpen kúres – 32,6%; Eldi mekenderdi tazalaý jáne abattandyrý, vandalızm men mádenıetsizdikke qarsy sharalar – 14,7%; Elden zańsyz shyǵarylǵan aktıvter men kapıtaldy qaıtarý – 5,8%.Eldi sıfrlandyrý:
Memlekettik qyzmetterdiń sıfrlyq formatta damýy – 30,7%; Otbasynyń sıfrlyq kartasyn, áleýmettik ámııandy engizý – 16,1%.QR Prezıdenti janyndaǵy Qazaqstannyń strategııalyq zertteýler ınstıtýty saýalnama nátıjeleri azamattardyń ómiriniń túrli salalarynda naqty ózgeristerdi baıqap otyrǵanyn kórsetetine nazar aýdarǵan. Bul óz kezeginde júrgizilip jatqan reformalardyń alǵashqy nátıjesin berip, memlekettik saıasatqa degen qoǵamdyq senimdi nyǵaıtyp, bolashaqqa qatysty optımızmdi arttyrǵanyn ańǵartady.
Ekonomıkalyq reformalar men áleýmettik bastamalardyń tıimdi júzege asyrylýy el basshylyǵyna degen qoǵamdyq senim deńgeıinen baıqalǵan. Áleýmettanýlyq zertteý derekterine sáıkes, Prezıdent reıtıngtiń aldyńǵy qatarynda tur – saýalnamaǵa qatysqandardyń 82,4%-y oǵan senim bildirgen.
Sonymen qatar, eldegi oń ózgerister patrıottyq kóńil-kúıdiń artýyna tikeleı yqpal etip keledi. Saýalnamaǵa qatysqan respondentterdiń 89,9% Qazaqstan jáne óz azamattyǵymen maqtanatynyn atap ótken. («óte maqtanamyn» – 49,1% jáne «maqtanamyn» – 40,8%).
Eldiń bolashaq damýy turǵysynan respondentter Qazaqstannyń aımaqtyq qana emes, jahandyq deńgeıde de kóshbasshy bola alatyn birqatar salalaryn aıqyndady. Respondentterdiń pikirinshe, eldiń eń perspektıvaly TOP-5 damý baǵyty mynadaı:
Agroónerkásiptik sektor – 38,9%. Sıfrlandyrý jáne jasandy ıntellekt – 30,6%. Energetıka – 25,3%. Kólik jáne tranzıt – 17,5%. Adamı kapıtaldy damytý – 13,1%.