Prezıdenttiń pikirinshe, álemdegi munaı-gaz salasy kóptegen memleket pen belgili sarapshylardyń jiti baqylaýynda, dep habarlaıdy Egemen.kz Aqordanyń baspasóz qyzmetine silteme jasap.
Salanyń keleshegi onyń jahan ekonomıkasynyń damý perspektıvasyna yqpal etýi turǵysynan talqylanyp jatyr.
«Meniń paıymdaýymsha, kómirsýtegi dúnıe júziniń energetıka naryǵynda, sáıkesinshe, Qazaqstannyń energetıka salasynda burynǵydaı basty rólge ıe bola beredi. Birqatar eldiń, sonyń ishinde eýropalyq memleketterdiń tájirıbesi kórsetkendeı, balama qýat kózi qajettilikti tolyq óteı almaıdy. Budan bólek, ónerkásipte, sonyń ishinde elektr stansalarynyń qurylysynda kómirdi zalalsyzdandyratyn ozyq tehnologııany paıdalanýǵa basa mán berý qajet. Qazaqstannyń energııa balansynda kómirdiń úlesi 70 paıyzǵa jýyq ekeni málim. Elimiz kómir óndirýden on iri eldiń qataryna kiredi. Bul artyqshylyqtan bas tartpaǵan jón. Kerisinshe, ony tıimdi paıdalaný kerek», dedi Memleket basshysy. Sonymen qatar Prezıdent otandyq munaı-gaz kesheniniń aldynda tehnologııalyq jańǵyrý, atap aıtqanda, jasandy ıntellektini engizý mindeti turǵanyn jetkizdi. «Zamanaýı tehnologııalar munaı jáne munaı ónimderin óndirý, tasymaldaý jáne qaıta óńdeý isin ońtaılandyrýǵa yqpal etý qajet. Otandyq munaı-gaz ónerkásibi zamanaýı úrdisterge saı bolýy kerek. Sondyqtan osy salaǵa taza jáne ozyq tehnologııalardy engizý óte mańyzdy. Geologııalyq barlaý jumystaryn kúsheıtip, jańa ken oryndaryn ashýǵa basa mán berý kerek. Buǵan qosa osy salaǵa bilimdi, jas kadrlardy tartyp, adam áleýetin barynsha arttyrý qajet. Sebebi jahandyq básekege qabiletti bolý úshin bizge, eń aldymen, bilikti mamandar kerek. Bilim baǵdarlamasyn jetildirip, zertteý ortalyqtaryn damytqan jón. Osy mindetterdi sapaly oryndasaq, Ádiletti, Qýatty, Taza jáne Ozyq Qazaqstannyń qalyptasýyna jol ashamyz», dedi Qasym-Jomart Toqaev. Sondaı-aq Memleket basshysy qoǵamdaǵy eńbek adamynyń orny týraly pikir bildirdi. «Eńbekqorlyq – eń asyl qasıettiń biri. Men ár sózimde osy máselege erekshe mán beremin. Mańdaı termen kelgen adal eńbektiń qadirin biletin jurt ozyq oıly ult bolady. Halqymyzda «Eńbegine qaraı – qurmeti» degen jaqsy sóz bar. Eńbek adamy – el adamy. Eńbek adamy, eń aldymen, týǵan eliniń jarqyn keleshegi úshin aıanbaı jumys isteıtin adam. Sondyqtan qazir biz elimizde jumysshy mamandaryn keńinen dáriptep, olarǵa erekshe qurmet kórsetip jatyrmyz. Men jyl basynan beri elimizdiń ár salasynda jumys istep júrgen azamattardy arnaıy shaqyryp, marapattap jatyrmyn. Muny halqymyzdyń Sizderge kórsetken ystyq yqylasy, shynaıy qurmeti men alǵysy dep túsingen jón» dedi Prezıdent.