2025 jylǵy 5 qyrkúıekte Halyqaralyq «Qazaq tili» qoǵamy Qazaqstan halqy tilderi kúni men Ahmet Baıtursynulynyń týǵan kúnine oraı Astana qalasyndaǵy Nazarbaev ýnıversıtetinde «Qazaq tili – ǵylym men tehnologııa tili» atty respýblıkalyq konferensııa ótkizdi, dep habarlaıdy Egemen.kz.
Is-sharaǵa QR Ǵylym jáne joǵary bilim mınıstri Saıasat Nurbek, QR Sıfrlyq damý, ınnovasııalar jáne aeroǵarysh ónerkásibi mınıstri Jaslan Madıev, «Qazaqtelekom» AQ basqarma tóraǵasy Baǵdat Mýsın, Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń bas dırektory Maqpal Jumabaı jáne ǵalymdar men sala mamandary qatysty. Sondaı-aq, elimizdiń barlyq óńirinen til saıasatyna jaýapty qyzmetkerler men bilim basqarmalarynyń ókilderi onlaın túrde qosyldy.
Jıynda ǵylym, bilim, tehnologııa, til saıasaty men sıfrlyq damý máseleleri talqylanyp, memlekettik tildiń qazirgi ǵylymı jáne sıfrlyq keńistiktegi orny men áleýeti jan-jaqty qarastyryldy.
Halyqaralyq «Qazaq tili» qoǵamynyń prezıdenti Raýan Kenjehanuly qazaq tilindegi mátindi dybystyq formatqa aınaldyratyn «TTS» (Text-to-Speech) jobasyn usyndy. Bul joba qazaq tiliniń dybystyq qoryn jasandy ıntellekt júıesine engizip, ony ǵylym men tehnologııa salasynda qoldaný aıasyn keńeıtýdi kózdeıdi. Qazaqsha dybys modeli álemdik Hugging Face platformasynda jarııalanatyn bolady.
Sonymen qatar, konferensııa barysynda Halyqaralyq «Qazaq tili» qoǵamy men «Til-Qazyna» ortalyǵy birlesip, «Ulttyq dıktant» jobasynyń resmı bastalǵanyn habarlady. Onyń maqsaty – jazý mádenıetin jetildirý, saýatty jazý daǵdylaryn qalyptastyrý jáne til arqyly ulttyq biregeılikti nyǵaıtý. Dıktant oflaın jáne onlaın formatta ótkizilip, oǵan barlyq azamattar qatysa alady.
Konferensııanyń resmı bóligi aıaqtalǵannan keıin qatysýshylardyń barlyǵy «Ulttyq dıktantqa» qatysty. Sharany belgili dıktor Qymbat Dosjan júrgizdi. Dıktant mátini qazaq ádebıetiniń klassıkterinen alyndy. Bul synaqta baǵa qoıylmaıdy, árkim óz bilimin ózi tekseredi.
Onlaın dıktantty www.til.kz saıtyndaǵy arnaıy paraqshada kez kelgen ýaqytta oryndaýǵa múmkindik bar. Qatysýshylarǵa elektrondy alǵys hatpen qatar KITAP platformasyna tegin jazylym beriledi.
Joba nátıjeleri jyl sońyna deıin jarııalanyp, «Ulttyq dıktant» dástúrli túrde jyl saıyn ótkizilmek.