Avtorlyq eńbek – qýanyshty da azapty úderis. Tańǵajaıyp qubylys desek te qatelespeımiz. Oılap qarańyzshy, tabıǵattyń mármár tasynan músinshi qalaı Iýpıterdiń beınesin kóredi? Al kádýilgi qaıyń japyraǵynyń adamnyń júregine uqsaıtynyn Muqaǵalı qaıtip ańǵardy? Pýshkınshe tolǵansaq, áserdiń mundaı shapshańdyǵyn, ózindik shabyt pen syrtqy bógde erik arasyndaǵy tyǵyz baılanysty ımprovızatordyń ózinen basqa eshkim de túsine almaıdy. Mine, osy sebepti shyǵarmanyń qalaısha dúnıege kelgendigin avtordyń ózinen surap bilý – ádebıettanýdyń úlken oljasy.
Osy maqsatta Jazýshylar odaǵy Astana fılıalynyń yjdaǵatymen hám qalalyq ákimdiktiń qoldaýymen klassık jazýshy, Memekettik syılyqtyń laýreaty Tólen Ábdiktiń «Jazýshy laboratorııasy» taqyrybyndaǵy dárisi ótti. Kópshilik oqyrmanǵa belgili, Ábdikulynyń ádebıet álemi parasat maıdanyndaǵy izgilik pen zulymdyqtyń qaqtyǵysy, adamdyq tolǵanystar men qoǵamdyq qoparylystardan turady. Jazýshyny qalyptasqan ortasy tárbıelep shyǵatynyn eskersek, qalamgerdiń zamany osy taqyryptarǵa ózi ákelgenin aqylmen ańǵarýǵa bolady. «Sol jyldary meniń jáne qatarlastarymnyń kóbinde protestik kóńil-kúı boldy» degen qalamgerdiń sózinen keńestik qalypqa syımaı, alqynyp-bulqynyp jatqan qazaq ádebıetiniń emosııanaldy ahýaly kórinedi.
Jazýshynyń qatarlastarym dep otyrǵany, óziniń jaqyn dostary – Ánes Saraı, Qajyǵalı Muhanbetqalıuly, Dýlat Isabekov, Beksultan Nurjeke. Bári – bir kýrstan túlep ushqan memlekettik syılyqtyń laýreattary, qazaqtyń qabyrǵaly qalamgerleri bolyp shyqty. «Adamnyń ómirine jaryq shashatyn nárse – dostyq. Men bul jigittermen týysqanymnan jaqyn aralastym», dep aǵynan jaryldy Tólen Ábdik. «Únemi shyǵarmashylyq izdenistiń nátıjesinde bizdiń býyn keremet shyǵarmalardy qatarynan dúnıege ákeldi. Máselen, Muqaǵalı Maqataev «Dýlattyń «Súıekshisin» oqyp jyladym» degeni bar. Bir qyzyǵy, bul – Isabekovke zamanynda berilgen biren-saran baǵanyń bireýi. Al onyń jazǵan shyǵarmalary búgingideı qoshemetpen qurmettelgen joq. Aǵalar tarapynan qatardaǵy týyndalar sekildi qabyldandy. Bárimizde de solaı boldy. Asyra maqtalmaǵany keıin ózimizge jaqsy boldy. Arqamyzdan qaǵa berse, keıingi jazylǵan kesek týyndylar dúnıege kelmes te edi», dedi Tólen aqsaqal. Osy rette ol jas jazýshylardyń ásire maqtanǵa salynbaý kerektigin basa aıtty.
Kórermen arasynan jas jazýshy suraq qoıdy. Saýalynyń ráýishi «biz álemdik taqyryptarǵa barǵymyz keledi, biraq ony klassıkalyq oqyrman sanasy qabyldaı qoıar ma eken?» degenge saıady. Sonda lektor: «Sheberlik jetse kez kelgen taqyrypta jazýǵa bolady», dep jaýap berdi. Naqty ári batyl sóz. «О́nerdegi shyn sheberilikke aparar jol – eńbek, dıletanttyqqa – haltýra. Shyn sheber sheberlengen saıyn qınala, terleı túsýge tıis», degen ádebıettanýshy akademık Zeınolla Qabdolovtyń sózi osy oraıda oıǵa oralady.
Tólen Ábdik ári qaraı oıyn sabaqtady: «Kórkem shyǵarmada detalǵa mán berilý kerek. Kúlli sıýjet osy detalmen óriledi, sulýlyǵy aıqyndalady. Saldyr-kúldir baıandaýshylyq ádebıet keńistigine kirmeıdi», dedi jazýshy.
«Ádebıettiń altyn dáýiri ótip ketti» dep kúrsiný – qısynsyz. Altyn dáýir – salystyrmaly uǵym. Qazir de jaqsy proza men poezııa jazylyp jatyr. Tek qalamgerlerge izdenisti molaıtý kerek. Halyqqa qarapaıym ádebıet qana qajet degen oıdan alys bolǵan jón. Intellektýaldy shyǵarmany túsinetin oqyrman – jeterlik». Osylaısha Tólen Ábdik ádebıettiń arǵy-bergi dáýirindegi máselelerine toqtalyp, búgingi jaı-kúıine baǵa berdi.
Dáris sońynda Astana qalasy ákiminiń orynbasary Eset Baıken jazýshyǵa izgi iltıpatyn bildirip, shyǵarmashylyq tabys tiledi. Al Jazýshylar odaǵy Astana qalasy fılıalynyń basshysy Baýyrjan Babajanuly atalǵan jobanyń turaqty jalǵasatynyn jetkizdi.