Qonys aýylyndaǵy qýanysh

Jańa bilim ordasy Memleket basshysy Qasym-Jomart Toqaevtyń apatty mek­tepter­diń ornyna jańa bilim oshaqta­ryn salý jónindegi tapsyr­masyna sáıkes, «Qarashyǵa­naq Petrolıým Opereıtıng B.V.» kom­panııasynyń áleýmettik ja­ýap­kershilik aıasynda jú­zege asty. Mekteptiń alǵashqy qońyraý saltanatyna Batys Qazaqstan oblysy ákiminiń orynbasary Qa­ıyr­jan Meńdiǵalıev, «Qarashyǵa­naq Petroleým Opereıtıng B.V.» bas dırektorynyń orynbasa­ry Muhtar Mankeev, oblystyq bilim basqarmasynyń basshysy El­dos Safýllın, aýdan ákimi Aslan­bek Sarqulov, aýdandyq máslı­hat tóraǵasy Sársenbaı Moldashev qatysty.

Qonys aýylynda alǵashqy mekteptiń irgetasy 1948 jyly sa­lynǵan eken. 1976 jyly Krýpskaıa atyndaǵy 8 jyldyq mektep bo­lyp ózgergen kezde jańa ǵıma­raty boı kótergen. Biraq odan beri de jarty ǵasyrdan asa ýaqyt ótti. Tozǵan mekteptiń ornyna salynǵan jańa bilim orda­synda zaman talabyna saı jabdyqtalǵan 11 oqý kabıneti, sport zaly, ashana, kitaphana, máji­lis zaly bar.

 – Prezıdent bıylǵy Tamyz konferensııasynda «Búgin sana­ly urpaq tárbıeleı alsaq, erteń zaman kóshiniń basynda júre­miz. Sondyqtan osy salany qoldaý memlekettik saıasattyń negiz­gi basymdyǵy bolyp qala bere­di...» degen bolatyn. Bul bilim ordasynyń boı kóterýi — memleket pen bıznestiń, jergilikti bılik pen halyqtyń birlesken eńbeginiń jarqyn kórinisi. «Qarashyǵanaq Petrolıým Ope­reıtıng B.V.» kompanııasy óńirimizdiń áleýmettik damýyna belsendi úles qosyp keledi, – deıdi oblys ákiminiń orynbasary Qaıyrjan Meńdiǵalıev.

Qaıyrjan Ermekulynyń aıtýynsha, keıingi úsh jylda oblysta jalpy sany 7 526 oryn­dyq 26 mektep salynǵan. Sonyń ishinde KPO b.v. kompanııasy­nyń áleýmettik ınvestısııalyq jo­ba­sy aıasynda 1 344 orynǵa 16 mek­tep, jergilikti bıýdjet ese­bi­nen 1 982 orynǵa 7 mektep, «Ke­le­shek mektepteri» ulttyq jobasy aıasynda 4 200 orynǵa 3 mektep paıdalanýǵa berilgen. 2023 jyly Qaztalov aýylynda Alma Orazbaeva atyn­­daǵy 600 oryndyq mektep, Jul­dyz aýylynda A.Husaıynov atyn­daǵy 108 oryndyq mektep, Bos­tandyq jáne Qaraoba aýyldaryn­da dárigerlik ambýlatorııa, son­daı-aq Qaraózen aýylynda feld­sherlik-akýsherlik pýnkt iske qosyldy. Al 2024 jyly Saral­jyn aýylynda 60 oryndyq mektep, Qaıshaqudyq aýylynda mo­dýldi medısınalyq pýnkt, Qa­ıyńdy aýylynda jańa má­de­nıet úıi, Qaztalov aýylynda 320 oryndyq zamanaýı sport kesheni paıdalanýǵa berildi. 2025 jyly 4 baǵyt boıynsha 20 áleý­mettik nysanǵa gaz kirgizildi, «Qaladan – aýylǵa» baǵdarlamasy boıynsha Jalpaqtal, Qaraózen, Oraz­ǵalı aýyldaryna kóship kel­­­­­gen 8 otbasyǵa páter kilti ta­bys­­­taldy. Seksenbaev, Bozo­ba, Be­­ıis­terek, Haırýsh aýyldary­na aýyz­sýǵa arnalǵan blok-modýl­di keshen ornatyldy. «Bul nysan­dar – aýdan turǵyndary­­­­nyń áleý­mettik jaǵdaıyn jaq­sar­tý­ǵa, sa­paly bilim, densaýlyq saq­taý jáne mádenı-sporttyq ın­fra­qu­rylymdy damytýǵa baǵyt­­talǵan memlekettik saıa­sat­tyń jemisti nátıjesi» deıdi orynbasar.

Bilim ordasynyń ashylý saltanatynda jańa mektepke oblys ákiminiń atynan LED ekran ­tabystaldy.

Batys Qazaqstan oblysy