QR Densaýlyq saqtaý mınıstrligi oqýshynyń jasyna qaraı mektep sómkesiniń salmaǵy qansha bolýy kerek ekenin aıtty, dep habarlaıdy Egemen.kz.
Densaýlyq saqtaý mınıstrligi jańa oqý jylynyń bastalýymen mektep sómkesin durys tańdaýdyń mańyzdylyǵyn eske saldy. Dárigerlerdiń aıtýynsha, tym aýyr nemese qolaısyz sómke oqýshynyń omyrtqasyna jáne jalpy densaýlyǵyna keri áser etýi múmkin.
Sómke salmaǵynyń normalary
1–3-synyptar — 2 kılogramǵa deıin;
4–5-synyptar — 2,5 kılogramǵa deıin;
6–7-synyptar — 3,5 kılogramǵa deıin;
8–11-synyptar — 4,5 kılogramǵa deıin.
Mınıstrlik ókilderi jalpy salmaq balanyń dene massasynyń 10 paıyzynan aspaýy tıis ekenin atap ótti.
Sómke tańdaǵanda nazar aýdaratyn jaıttar
keń, jumsaq qaptamasy bar ıyqbaýlar;
ortopedııalyq arqalyq;
jeńil ári sý ótkizbeıtin materıal;
jaryq shaǵylystyrǵysh belgiler men partaǵa ilýge yńǵaıly ilgektiń bolýy.
Ata-analar balalarynyń densaýlyǵyn saqtaý úshin mektep sómkesin únemi qadaǵalap otyrǵany jón. Eń aldymen, rıýkzakty únemi tekserip, artyq zattardy alyp tastaý qajet. Sonymen qatar, balaǵa sómkeni mindetti túrde eki ıyqqa taǵyp júrýge úıretken durys. Al múmkin bolǵan jaǵdaıda keıbir aýyr kitaptardy mektepte qaldyryp ketýge muǵalimmen kelisken jón.