ASTANA. 23 maýsym. Keshe Astanada fýtboldan 17 jasqa deıingi jastar quramalary arasynda Qazaqstan Prezıdentiniń Kýbogy úshin halyqaralyq týrnır bastaldy. Bıyl VIII ret uıymdastyrylǵan jarysqa 8 memleket qatysýda. Bul týraly ras.kz habarlady.
Qatysýshy komandalar eki topqa bólindi. Onyń birinshisinde Belarýs, Ázerbaıjan, Reseı-2, Grýzııa komandalary bolsa, ekinshisine Ispanııa, Tájikstan, Qazaqstan, Qyrǵyzstan jastary toptasqan.
Ispan mamany Karlos Martorella jattyqtyratyn Qazaqstan jastar quramasy alǵashqy oıynyn Qyrǵyzstanǵa qarsy ótkizdi. Bul oıynda esepti qonaqtar ashty. Kezdesýdiń 25-mınýtynda Emır Shygaıbaev mergendigimen kózge túsip, komandasyn esepte alǵa shyǵardy. Al alań ıeleri tek 68-mınýtta ǵana tarazy basyn teńestirýge múmkindik tapty. Nátıjeli soqqynyń avtory – Saǵadat Tursynbaı. Arada úsh mınýt ótken kezde qazaq ulandary ekinshi goldaryn soqty. Bul joly dop Mádı Jaqypbaevtyń enshisine jazyldy. Oıynnyń núktesin 80-mınýtta Qazaqstan fýtbolshysy Muhıt Jaqsylyq qoıdy. Nátıjesinde jastarymyz 3:1 esebimen jeńiske jetti.
Keshe ótken ózge oıyndardyń nátıjeleri tómendegideı:
Belarýs – Ázerbaıjan 1:3
Goldar: Ksenofontov 4 – Mehdıev 23, Asadov 30, Gýler 78.
Ispanııa – Tájikstan 3:0
Goldar: Alehandro 13, Bartalone 71, Brandarıs 79.
Reseı-2 – Grýzııa 0:2
Goldar: Kımerıdze 13, Harabadze 35.
Búgin 2-týr aıasynda Belarýs Grýzııadan 1:2 esebimen jeńilse (goldar: Kazakov 17 – Spanderashvılı 16, Harabadze 58), Ázerbaıjan Reseıdiń ekinshi quramasynan 1:0 esebimen basym tústi (gol: Oksýz 16). Dál qazir Tájikstan men Qyrǵyzstan fýtbolshylary kúsh synasýda. Al Qazaqstan – Ispanııa oıyny saǵat 19:00-de bastalady.
Sońǵy týr oıyndary 25 maýsymda oınalady. Bul synda Grýzııa – Ázerbaıjan, Reseı-2 – Belarýs, Ispanııa – Qyrǵyzstan jáne Qazaqstan – Tájikstan arasyndaǵy oıyndarǵa kýá bolamyz.
Týrnırdiń fınaldyq kezeńi 26 maýsymǵa josparlanǵan. Ár toptaǵy birinshi oryn alǵan komandalar fınalda oınasa, 2-satyǵa taban tiregen quramalar qola júlde úshin baq synaıdy. Qalǵan oryndar da osy tártip boıynsha sarapqa salynady.
Elaman Qońyr.
Derek: ras.kz.
Sýret: presidentcup.kz.