Qazaqstandaǵy Qoljazbalar jáne sırek kitaptar ulttyq ortalyǵy qoryna XI ǵasyrǵa tıesili qundy tarıhı derek qosyldy. Ulybrıtanııa elshiligi ortalyqqa Oksford ýnıversıtetiniń Bodlıan kitaphanasynda saqtalǵan «MS. Arab. c. 90» shıfrly qoljazbanyń 44a paraǵynda beınelengen Ortalyq Azııa kartasynyń kóshirmesin syıǵa tartty, dep habarlaıdy Egemen.kz.
Mádenıet jáne aqparat mınıstrliginiń habarlaýynsha, atalmysh qoljazba XI ǵasyrda qurastyrylǵan «Kıtab garaıb ál-fýnýn ýa mýlıah ál-ýıýn» («Ǵylymdardyń ǵajaıyptary men kóz qýanyshtary kitaby») atty eńbektiń jalǵyz belgili nusqasy. Ǵalymdardyń boljamynsha, bul qoljazba XII ǵasyrdyń sońǵy kezeńi men XIII ǵasyrdyń basynda Mysyrda kóshirilgen.
Kartada qazirgi Qazaqstan aýmaǵyndaǵy mańyzdy tarıhı nysandar kórsetilgen. Sonyń ishinde Jankent qalasy erekshe atalyp, arab tilinde «Ál-karııa ál-hadısa» («Jańa qala») dep berilgen. Tarıhı derekter Jankenttiń VIII–XI ǵasyrlarda oǵyz memleketiniń astanasy bolǵanyn aıǵaqtaıdy. Sonymen qatar kartada Qazaqstannyń ońtústiginde ornalasqan negizgi qalalar da beınelengen.
Aıta keteıik, bul qoljazba 2002 jyly qaıyrymdylyq uıymdarynyń qoldaýymen satyp alynyp, keıinnen tolyq sıfrlandy. Búginde ol ıslamdyq ortaǵasyrlyq geografııa men kitap ónerin zertteýde taptyrmas derekkóz bolyp sanalady.
XI ǵasyrdan jetken karta Orta Azııa men Qazaqstannyń tarıhı kelbetin aıqyndap, ǵylymı, mádenı jáne ulttyq turǵydan úlken mańyzǵa ıe jádiger retinde baǵalanyp otyr.