Bolashaq ustazdar – Qazaq ulttyq qyzdar pedagogıkalyq ýnıversıttetiniń 12 myńnan astam stýdenti men magıstranttary Coursera, Huawei jáne Astana Hub platformalaryndaǵy kýrstardy aıaqtap, biliktiligin arttyrdy, dep jazady Egemen.kz.
2025 jylǵy 8 qyrkúıekte Memleket basshysy Qasym-Jomart Toqaev Qazaqstan halqyna arnaǵan Joldaýynda «Qazaqstan mindetti túrde sıfrlyq el bolýy kerek» dep atap ótti. Sonymen birge jasandy ıntellektimen jumys isteý quziretin qalyptastyrý áldeqaıda erte jastan, ıaǵnı mektep qabyrǵasynan qolǵa alynýǵa tıis ekenin aıtty.
«Meniń tapsyrmammen 100 myńǵa jýyq stýdentti tehnologııalyq jobalarǵa tartýdy kózdeıtin Al-Sana baǵdarlamasy júzege asyryla bastady. Alaıda jasandy ıntellektimen jumys isteý quziretin qalyptastyrý áldeqaıda erte jastan, ıaǵnı mektep qabyrǵasynan qolǵa alynýǵa tıis. Osyǵan oraı birqatar bastamany júzege asyrǵan jón. Eń aldymen, mektep oqýshylaryna arnalǵan jasandy ıntellekt negizderi týraly baǵdarlama jáne oqý materıaldaryn ázirleý qajet. Ustazdardyń jasandy ıntellekt tehnologııasyn meńgerý daǵdysyn da qalyptastyrý kerek bolady», – dedi Qasym-Jomart Kemeluly Toqaev.
Qazaq ulttyq qyzdar pedagogıkalyq ýnıversıttetiniń Basqarma Tóraǵasy-Rektorynyń m.a. Sýataı Sabıt Qurmanjanuly oqý orny Prezıdent tapsyrmalaryn tolyq qoldaı otyryp, jasandy ıntellekt salasynda tyń jobalardy júzege asyryp kele jatqanyn aıtty.
«2024 jylǵy 11 jeltoqsanda Astana qalasyndaǵy Astana Hub alańynda Memleket basshysy resmı tanystyrǵan AI-SANA baǵdarlamasy elimizdiń sıfrlyq transformasııasyna jańa serpin berdi. Ýnıversıtet bul bastamany alǵashqylardyń biri bolyp qoldap, bilim, ǵylym jáne startap-ekojúıeni damytý baǵytynda júıeli jumystar atqarýda. О́tken oqý jylynda QyzPU-dyń 12 myńnan astam stýdenti men magıstranttary Coursera, Huawei jáne Astana Hub platformalaryndaǵy kýrstardy aıaqtap, sertıfıkattar aldy. Ýnıversıtettiń biliktilikti arttyrý ortalyǵynda professorlyq-oqytýshylyq quram úshin «Bilim berýdegi jasandy ıntellekt: negizderi jáne praktıkalyq qoldaný» kýrsy turaqty túrde ótkizilip keledi. Tek sońǵy eki jylda 400-ge jýyq oqytýshy osy kýrstan ótip, óz tájirıbesinde AI tehnologııalaryn qoldana bastady» – dedi rektordyń mindetin atqarýshy.
Sonymen qatar ýnıversıtette jańa bilim berý baǵdarlamalary men kýrstar oqytyla bastady. Barlyq mamandyqqa arnalǵan «Jasandy ıntellekt negizderi» páni engizildi. «Qoldanbaly jasandy ıntellekt» atty jańa bilim berý baǵdarlamasy ashylyp, alǵashqy stýdentterin qabyldaýdy bastady. Ýnıversıtettiń ınfraqurylymyna AI agentter – «TalapkerQyzPU», «iHelpDesk», «Qujattyq kenes», «KitapOqy», «Avatar QyzPU» engizilýde.
«Prezıdent Joldaýyndaǵy «Ustazdardyń jasandy ıntellekt tehnologııasyn meńgerý daǵdysyn qalyptastyrý qajet» degen sózi bizdiń ýnıversıtettiń strategııalyq baǵytymen tolyq úılesedi. Biz jasandy ıntellektini bilim berý júıesine engize otyryp, bolashaq muǵalimderdi jańa dáýirdiń talaptaryna saı daıyndaımyz. Qazaq ulttyq qyzdar pedagogıkalyq ýnıversıteti Prezıdenttiń bastamalaryn tolyq qoldaı otyryp, bilim, ǵylym jáne ınnovasııany toǵystyrǵan, jasandy ıntellekt dáýirinde jetekshi oqý orny bolýǵa daıyn», – dep atap ótti Sabıt Qurmanjanuly.