QR Oqý-aǵartý mınıstrliginiń málimetinshe, 2025–2026 oqý jylynda tehnıkalyq jáne kásiptik bilim berý uıymdarynda dýaldy oqytý júıesine qatysatyn stýdentterdiń sany 135 myńǵa jetedi. Bul ótken jylmen salystyrǵanda 27 myńǵa artyq, dep habarlaıdy Egemen.kz.
Mınıstrliktiń habarlaýynsha, dýaldy oqytý formaty teorııalyq daıyndyqty óndiristik tájirıbemen ushtastyrýǵa baǵyttalǵan. Oqý prosesiniń 60%-y óndiriste ótedi, bul stýdentterdiń eńbek naryǵynda suranysqa ıe mamandyqtardy tájirıbelik turǵydan meńgerýine múmkindik beredi.
Aıta keteıik, qazirgi tańda elimizde 552 kolledj jáne 18 myńnan astam kásiporyn dýaldy júıege qatysyp jatyr. Olardyń qatarynda mashına jasaý, qurylys, energetıka, IT jáne servıs salalaryndaǵy kásiporyndar bar.
«Dýaldy oqytýdy damytý – tehnıkalyq jáne kásiptik bilim berý júıesindegi basym baǵyttardyń biri. Búginde memlekettik tapsyrys boıynsha bilim alǵan kolledj túlekteriniń 70%-dan astamy oqýyn támamdaǵan soń birden óz mamandyǵy boıynsha jumysqa ornalasady», dedi Tehnıkalyq jáne kásiptik bilim berý departamentiniń dırektory Aset Mýhanbetov.
2024 jyly dýaldy formatta oqýyn támamdaǵan 30 myńnan astam túlektiń 71%-y qazirgi tańda eńbek qyzmetine kirisken. Al 2027 jylǵa qaraı dýaldy oqýmen qamtylǵan stýdentterdiń úlesin 50%-ǵa deıin jetkizý josparlanǵan. Osy maqsatta Germanııanyń Erfýrt ýnıversıtetimen birlesip Halyqaralyq dýaldy oqytý ortalyǵyn ashý jáne «Atameken» UKP qoldaýymen tálimgerlik ınstıtýtyn damytý kózdelip otyr.