«Qarasora – 2025» jedel-profılaktıkalyq is-sharasy barysynda 9 esirtki zerthanasy joıyldy, dep habarlaıdy Egemen.kz IIM baspasóz qyzmetine silteme jasap.
2025 jyldyń maýsym aıynan bastap «Qarasora – 2025» atty keń aýqymdy jedel-profılaktıkalyq is-shara ótip jatyr. Onyń maqsaty – esirtki tektes ósimdikterdiń tabıǵı oshaqtary men plantasııalaryn anyqtap joıý, esirtki zerthanalary men arnalaryn, sondaı-aq esirtki taratýmen aınalysatyn uıymdasqan qylmystyq toptardyń áreketin toqtatý.
Mindetterdi nátıjeli oryndaý úshin IIM-niń arnaıy bólimsheleri men Ulttyq ulan kúshteri jumyldyryldy, ushqyshsyz ushý apparattary men tikushaqtar qoldanylyp jatyr.
Bar-joǵy úsh aı ishinde 40 áýe reıdi jasalyp, nátıjesinde 20 esirtki egistigi anyqtaldy. 5 myńnan astam esirtki tektes ósimdik túbimen joıylyp, jalpy salmaǵy 1 tonnadan asatyn ónim tárkilendi.
Ulytaý oblysynda ońtústik óńirlerden ortalyq jáne soltústik Qazaqstanǵa esirtki jetkizý arnasy toqtatyldy. Qylmystyq toptyń 4 múshesi ustaldy. Olardan jol talǵamaıtyn kólikter, oq-dárileri bar oıyq uńǵyly qarý jáne 103 kg marıhýana tárkilendi.
Jambyl oblysynda marıhýana daıyndap, satýmen aınalysqan eki azamat ustaldy. Olardan 206 kg-nan astam esirtki zat alyndy.
Batys Qazaqstan oblysyndaǵy jekemenshik sektordan joǵary konsentrasııaly qarasora ósirilgen jylyjaı tabyldy. 47 túp, jalpy salmaǵy shamamen 135 kg ónim tárkilendi.
Túrkistan oblysynyń qıyn taýly aımaqtarynda Ulttyq ulannyń qatysýymen qurylǵan arnaıy top úsh azamatty qolǵa túsirdi. Olardyń qolynan oıyq uńǵyly qarý, 650 kg-nan astam qarasora jáne 48 kg-ǵa jýyq kóknár tárkilendi.
Jezqazǵan men Sátbaev qalalarynda zańdy taýar túrinde búrkemelengen esirtki ónimi jetkizilip júrgeni áshkerelendi. Zańsyz aınalymnan 43 tonnadan astam kóknár alyndy.
Operasııa qorytyndysy boıynsha:
677 esirtki qylmysy anyqtaldy, sonyń ishinde 242 satý jáne 220 zańsyz ósirý deregi;
2 tonna marıhýana, 47 kg gashısh, 3 tonna qarasora ósimdigi, 155 kg sıntetıkalyq esirtki jáne 8,5 tonna prekýrsor tárkilendi;
27 myńnan astam esirtki ósimdigi joıyldy;
9 esirtki zerthanasy joıylyp, 3 uıymdasqan qylmystyq toptyń, sonyń ishinde bir transulttyq toptyń áreketine tosqaýyl qoıyldy.
Bul baǵyttaǵy jumystar jalǵasyp jatyr.
Aıta ketsek, operasııa kezinde erekshe nazar esirtki ósimdikteriniń shıkizat kózi ornalasqan eldiń ońtústik aımaqtaryna aýdarylyp otyr.