Úkimet otyrysynda Premer-mınıstr Oljas Bektenov Prezıdenttiń 2025 jylǵy Joldaýyn iske asyrý aıasynda shekaradaǵy ótkizý pýnktteriniń ınfraqurylymyn damytýǵa erekshe kóńil bólinetinin atap ótti. Bul kólik-logıstıkalyq keshendi jetildirýdiń mańyzdy bóligi bolyp sanalady, dep habarlaıdy Egemen.kz.
Premer-mınıstrdiń aıtýynsha, júrgizilgen sharalar nátıjesinde shekaradan ótý ýaqyty 2 saǵattan 30 mınýtqa deıin qysqarǵan.
«Úkimet shekaradan ótý rásimderin jetildirýdi jalǵastyrady. О́tkizý pýnktterinde jyldamdyq pen jaılylyq standartqa aınalýy kerek. Qarjy mınıstrligi Kólik mınıstrligi, ákimdikter jáne Shekara qyzmetimen birlesip jyl sońyna deıin 8 ótkizý pýnktin jańǵyrtýdy aıaqtaýy tıis», dedi Oljas Bektenov.
Sonymen qatar keden beketteriniń aınalasyndaǵy ınfraqurylymdy — qoımalar men servıstik nysandardy damytý qajettigi aıtyldy. Qazirdiń ózinde saqtaý, suryptaý, tasymaldaý jáne sıfrlyq servısterge ınvestısııa salýǵa daıyn ınvestorlar bar.
Premer-mınıstr Qarjy mınıstrligine Kólik, Aýyl sharýashylyǵy, Sıfrlandyrý mınıstrlikterimen, Shekara qyzmeti jáne ákimdiktermen birge osy ınfraqurylymdy damytý boıynsha naqty sharalar qabyldaýdy tapsyrdy.