Elordada aýmaqtyq qorǵanys brıgadasynyń bazasynda 90 áskerı mindetti on kúndik daıyndyqtan ótedi. Olardyń qatarynda 17 zapastaǵy ofıser, 73 serjant jáne qatardaǵy jaýynger bar, dep habarlaıdy Egemen.kz.
Qorǵanys mınıstrliginiń habarlaýynsha, jattyǵý barysynda taktıkalyq, atys, saptyq, medısınalyq jáne ınjenerlik daıyndyq qamtylǵan. Sondaı-aq áskerı bólimsheler quramynda birlesken is-qımyl jasaýǵa, tótenshe jaǵdaılarda áreket etýge jáne strategııalyq nysandardy qorǵaýǵa basa nazar aýdarylady.
«Áskerı jıyndar – ulttyq qaýipsizdik júıesiniń mańyzdy elementi. Biz áskerı mindettilerdiń qyzmet barysynda alǵan bilimderi men daǵdylaryn ózektendirip qana qoımaı, olardy aýmaqtyq qorǵanystyń zamanaýı talaptaryna sáıkes áreket etýge úıretemiz», dedi Astana qalasynyń qorǵanys isteri jónindegi departamentiniń bastyǵy polkovnık Farhat Qurmanǵajınov.
Jıynǵa qatysýshylar ártúrli salanyń ókilderi. Atap aıtsaq, pedagogtar, kásipkerler, memlekettik qyzmetkerler, ınjenerler men júrgizýshiler. Olar ýaqytsha jumys ornynan qol úzip, eldiń qorǵanys qabiletin nyǵaıtýǵa óz úlesin qosyp otyr.
Zapastaǵy aǵa leıtenant, kvazımemlekettik sektordyń qyzmetkeri Baýyrjan Táttimbekov bul jıynǵa ekinshi ret qatysýda. Buǵan deıin ol 2018 jyly Qurlyq áskerleriniń áskerı ınstıtýtynda daıyndyqtan ótken.
«Mundaı jıyndar daǵdylardy jetildirýge ári jańa bilim alýǵa jaqsy múmkindik beredi. Bul – Otan qaýipsizdigine naqty úles qosýdyń joly. Áskerı mindettiler árqashan eldi qorǵaýǵa daıyn bolýy tıis» dedi ol.
Aıta keteıik, áskerı jıyn 17 qyrkúıekke deıin jalǵasady. Qoldanystaǵy zańǵa sáıkes, bul kezeńde áskerı mindettilerdiń jumys orny men ortasha eńbekaqysy saqtalady.