Jalaǵash aýdanyndaǵy Júrgenov aýylynda «Dala kúni – 2025» is-sharasy ótip, onda oblys ákimi Nurlybek Nálibaev pen Sý resýrstary jáne ırrıgasııa mınıstri Nurjan Nurjigitov kúrishke alǵashqy oraq salý rásimine qatysty. El nesibesiniń qambaǵa quıylar sáti bastaý alǵan jıynda aýyl sharýashylyǵy tehnıkalarynyń kórmesi uıymdastyrylyp, eńbekker jurttyń tynys-tirshiligin beıneleıtin qoıylymdar kórsetildi.
Oblys ákimi jınalǵandardy eginge oraq túsýimen quttyqtap, atqarylǵan jumystarǵa toqtaldy.
«Búgingi sát – dıqandardyń ekken bir dáni myń dán bolatyn, halyqtyń rızyq-nesibesi qambaǵa jınalatyn jaýapty shaq. Bıyl oblys boıynsha 189 600 gektarǵa aýyl sharýashylyǵy daqyldary egilse, onyń ishinde kúrish kólemi 80 900 gektar boldy. Keıingi jyldardaǵy sý tapshylyǵyn Syr dıqandary qatty sezinip keledi. Bıylǵy vegetasııalyq kezeń de óte kúrdeli jaǵdaıda ótti. Osy syndarly sátte Syrdarııa ózeniniń joǵary aǵysyndaǵy memlekettermen der kezinde júrgizilgen kelissózder bizge úlken qoldaý boldy. Memleket basshysynyń tapsyrmasyna sáıkes Úkimet rezervinen 53 jyljymaly-dızeldi nasos alýǵa 1 mlrd teńge bólinip, sharýalar ony ıgiligine paıdalandy. Tótenshe jaǵdaılar mınıstrligi elimizdiń barlyq óńirinen 139 qyzmetkerden quralǵan jeke quramdy, 25 dızeldi qondyrǵyny jetkizip, eki aı boıy sý tapshylyǵy týyndaǵan aýmaqtarda ýaqytpen sanaspaı jumys atqarǵanyn da aıryqsha aıta ketýimiz kerek», dedi.
Onyń sózinshe, óńirde arnaıy jumys toptary qurylyp, sýdy tıimdi paıdalaný maqsatynda egistikti kezektesip sýarý men qashyrtqydaǵy sýdy ekinshi ret paıdalaný jolǵa qoıyldy. Nátıjesinde, kúrish kólemin barynsha shyǵynsyz saqtaý múmkin boldy.
Sý resýrstary jáne ırrıgasııa mınıstri Nurjan Nurjigitov eńbekkerlerdi quttyqtap, vegetasııalyq kezeńdegi kúrdeli jaǵdaıǵa qaramastan jaqsy jetistikke jetken Syr dıqandaryna rızashylyǵyn bildirdi. Kúrishke alǵashqy oraq túser sátke jınalǵan jurt aldynda Qyzylorda oblysynyń qurmetti azamaty Bekmyrza Elamanov bata berdi.
Basqosýda birqatar azamatqa Premer-mınıstrdiń Alǵys haty, Aýyl sharýashylyǵy mınıstrliginiń «Aýyl sharýashylyǵy salasynyń úzdigi» tósbelgisi, Qurmet gramotasy, mınıstrdiń Alǵys haty, Sý sharýashylyǵy jáne ırrıgasııa mınıstrliginiń «Sý sharýashylyǵy salasynyń ardageri» tósbelgisi, Qurmet gramotasy tabystaldy.
Syrdarııadaǵy sý deńgeıi jyldan-jylǵa tómendep jatyr. Osyǵan baılanysty óńirdegi egin sharýashylyǵynda ártaraptandyrý jumysy jandanyp, sý únemdeý tehnologııalary keńinen engizilip keledi.
Qyzylorda oblysy,
Jalaǵash aýdany