Jaqynda «Egemen Qazaqstan» gazetinde «Mergender Kvandjýda jınaldy» (05.09.2005 jyl) degen maqala jaryq kórdi. Onda sadaq atýdan ótken álem chempıonattary tarıhynda elimizdiń mergenderi bir ǵana medal alǵanyna qynjylys bildirgen edik.
Joǵaryda atalǵan júldege HH ǵasyrdyń toqsanynshy jyldary qol jetkizdik. 1993 jyly Túrkııanyń Antalıa qalasynda uıymdastyrylǵan baıraqty básekeniń klassıkalyq sadaq atýshylar saıysynda Iаna Týnııans úzdik úshtikti túıindedi. Sodan beri baqandaı 15 jarysqa qatysqanymyzben, qanjyǵamyz bir maılanbaı-aq qoıdy. Mine, endi arada 32 jyl ótken soń, qazaq jankúıerleri medaldyń syńǵyryn estidi. Ońtústik Koreıanyń Kvandjý qalasynda jalaýy jelbiregen álem chempıonatynda bloktyq sadaq atýdan quramynda Ádel Jeksenbınova, Vıktorııa Lıan, Roksana Iýnýsova syndy sadaqshylary bar bizdiń komanda qola medal ıelendi. Bastapqy básekelerde Polsha (229:227), Estonııa (230:226), Italııany (228:227) utqan jerlesterimiz jartylaı fınalda dál osy dodanyń úsh dúrkin kúmis júldegeri Meksıkamen kezdesti. Negizgi ýaqyt 231:231 esebimen teń aıaqtaldy. Qosymsha ýaqytta astekterdiń baǵy jandy – 30:29.
Mergenderimiz úshinshi oryn úshin tartysta Ulybrıtanııamen sheberlik baıqasty. Jalpy, jer-jahannyń myqtylary jınalǵan jarysta Tumandy Albıon eliniń ókilderi 54 (9 altyn + 18 kúmis + 27 qola) márte jeńis tuǵyryna kóterildi. Syn saǵatta osyndaı asa azýly komandany otandastarymyz aýyzdyqtaı aldy. Asa shıelenisti ótken báseke 232:229 esebimen bizdiń sheberlerdiń paıdasyna sheshildi.