Er esimi el esinen shyqpasa eken

Bes kúndik jalǵanda jaıly ómir keship, maıly tamaq jep, jaqsy turyp, jaqsy júrsek degen ádepki pendelik paıym, adamı armannan ári asa almaı jatamyz. Dinı turǵydan oı qorytsaq, mundaı tirshilikte saýaptyń juǵyny da joq. Ony bilsek te, birbetkeı qalpymyzdan qaıtpaı, qara bastyń qamyn kúıttegenniń ústine kúıtteı túsemiz. Sóıtip, enshimizge berilgen ýaqyt maǵynasyz, mánsiz ótedi de ketedi. Alaıda, kópshilikke ortaq tanym-túsinikten joǵary tura­tyn jandar, bul ómirdi jaryq etip, tutas qoǵamdy qarańǵylyq túneginen qutqaryp jatady. Ulaǵatty ustazdardy adamdardyń sol sanatyna jatqyza alamyz. Bir ózi júzdegen, myńdaǵan búldirshinge aqyl quıyp, bilim darytatyn olardy arly adam tárbıeleýdiń eń tıimdi quraly dep qabyldasaq ta artyq emes. Osy aıtylǵan ıgi isterdi ómi­rine ózek etken jeteli ustazdardyń biri, Qaraǵandy oblysynyń týmasy – Ibragım Álibaev. Ol 1924 jyly qazaqqa nebir jaqsy menen jaısańdardy syılaǵan Jańaarqa óńirinde Túgisken aýylynda dúnıege kelgen. Otbasynda kenjesi bolǵan keıipkerimiz jas­taıynan zerek, oıly bolyp ósti. Oqýyn da ozat aıaqtap, úlken ómirdiń tabaldyryǵyna endi taqaǵan sátinde Uly Otan soǵysy bastalyp ketti. Sóıtip, 18-ge endi tolǵan Ibragım Álibaev 1942 jyldyń qazan aıynda maıdanǵa attanyp ketti. Máskeý túbindegi Krasnaıa Polıana mekeninde mergender kýrsynan ótip, surapyl soǵystyń otty jyldaryn Belorýs maıdanynda ótkerdi. San márte urysqa túsip, erlikpen shaıqasty. «Erligi úshin», «Kenıgsbergti azat etkeni úshin», «Jýkov» medaldary men II dárejeli Uly Otan soǵysy ordeni – sonyń aıǵaǵy. Qantógis soǵys kezinde efreıtor sheninde bolǵan ol, áskerı qyzmetin aǵa leıtenant sheninde aıaqtaǵan. 1946 jyldyń qyrkúıek aıynda soǵystan aman oralǵan Ibragım Álibaev bilimge den qoıyp, oqý oqydy. Pedagogıkalyq ınstıtýtty támamdap, ózi oqyǵan Túgisken mektebine ustaz bolyp bardy. Keıin sol mekteptiń dırektory qyzmetine taǵaıyndaldy. Jarty ǵasyrdan astam ýaqyt bala oqytyp, shákirt tárbıeleý isine shynaıy berilgen bul eńbegi de sol kezdegi Qazaq KSR Oqý mınıstrligi tarapynan joǵary baǵalanyp, ol «Halyq aǵartý isiniń úzdigi» ataǵyn aldy. Ibragım Álibaevtyń ómir jo­lyna qysqasha sholý jasap otyr­ǵanymyzdyń bir maqsaty bar. Ol – ardaqty ustazdyń esimi umyt qalmaýy tıis. Osy oraıda Túgisken aýylynyń orta mektebine Ibragım Álibaevtyń esimi berilse degen oıymyz aýdandyq bilim basqarmasynyń atqaminerleri tarapynan qoldaý ta­ýyp, tıisti sheshimin tabady dep senemiz. Asyl dinimizdiń ózinde meshit, kópir, mektep salǵandar men shákirt oqytqandardyń amal kitaby jabylmaıdy delingen. Osyny da esten shyǵarmaıyq, aǵaıyn! Dastan KENJALIN, «Egemen Qazaqstan».