Túrkistan oblysynda Dımash Qudaıbergen atqarýshy prodıýserlik etetin Voice Beyond Horizon halyqaralyq mýzykalyq shoýynyń túsirilimi bastaldy. Jobaǵa Qazaqstan, Qytaı, Qyrǵyz Respýblıkasy, Italııa, Malaızııa jáne Serbııa elderiniń ánshileri qatysýda, dep jazady Egemen.kz.
Qatysýshylar Túrkistan qalasyna poıyzben keldi. Túsirilim barysynda olar óńirdiń basty týrıstik jáne mádenı nysandarynda bolady. Atap aıtqanda, Qoja Ahmet Iаsaýı kesenesi ornalasqan «Áziret Sultan» memlekettik tarıhı-mádenı qoryq-mýzeıinde, kóne Otyrar qalashyǵynda, Karavansaray týrıstik kesheninde jáne etnoaýylda túsirilim jumystaryn júrgizedi. Baıqaý qatysýshylarynyń ónerin arnaıy shaqyrylǵan halyqaralyq sarapshylar baǵalaıdy.Túrkistandaǵy túsirilim aıaqtalǵan soń joba shyǵarmashylyq saparyn elimizdiń basqa óńirlerinde jalǵastyrady. Halyqaralyq shoý Mańǵystaý, Almaty jáne Aqmola oblystarynda, sondaı-aq Almaty men Astana qalalarynda ótedi. Jobanyń fınaldyq kezeńi elordada uıymdastyrylmaq.Aıta keteıik, Voice Beyond Horizon jobasyn Dımash Qudaıbergen Qytaıdyń Hunan Broadcasting System telearnasymen birlese júzege asyrýda. Atalǵan telearna men onyń Mango TV sıfrlyq platformasyn kúnine 210 mıllıonnan astam kórermen tamashalaıdy. Osy arqyly álemdik aýdıtorııa Qazaqstannyń týrıstik áleýetimen tanysýǵa múmkindik alady.Joba Qazaqstan Respýblıkasynyń Týrızm jáne sport mınıstrligi, Mádenıet jáne aqparat mınıstrligi, Kazakh Tourism ulttyq kompanııasy men jergilikti atqarýshy organdardyń qoldaýyna ıe.