Túrkistan oblystyq mádenıet basqarmasynyń qoldaýymen, Túrkistan oblystyq Y.Altynsarın atyndaǵy balalar kitaphanasynyń uıymdastyrýymen jýrnalıst, Qazaqstan Jýrnalıster odaǵynyń múshesi, “Nızamı” medaliniń ıegeri, «Sarasóz» jýrnalynyń quryltaıshysy ári bas redaktory Gýljaz Qarybektiń aýdarýymen jaryq kórgen túrik jazýshysy Fatma Gúnerdiń «Dostardyń mahabbaty» atty balalarǵa arnalǵan shyǵarmasynyń tusaýkeseri ótti, dep jazady Egemen.kz.
Kesh moderatory – jýrnalıst, Qazaqstan Jýrnalıster odaǵynyń múshesi, Qazaqstan Kompozıtorlar odaǵynyń qurmetti múshesi, sazger, ǵalym Bekjigit Serdáli boldy. Ol tusaýkeser keshin joǵary deńgeıde júrgizip, kitaptyń mazmuny men ıdeıalyq qundylyǵyna tereń úńilýge múmkindik berdi.
Tusaýkeser rásimin Túrkistan oblystyq mádenıet basqarmasy Mádenı is-sharalar jáne shyǵarmashylyq úıirmelerdiń jumysyn úılestirý bóliminiń basshysy Muqaǵalı Kenjetaıuly men Qoja Ahmet Iаsaýı atyndaǵy halyqaralyq qazaq-túrik ýnıversıtetiniń áleýmettik-mádenı damý jónindegi vıse-rektory, ǵylym kandıdaty, aǵa oqytýshy Tólegenov Edil Meıirbekuly ashyp berip, shyǵarma men onyń tárbıelik mańyzyna toqtalyp, aýdarmashy eńbegine sáttilik tiledi. Sóz sońynda Muqaǵalı Kenjetaıuly kitaptyń avtoryna Túrkistan oblysy mádenıet basqarmasynyń basshysy Ázimhan Serikulynyń atynan arnaıy alǵys hat pen syı syıapatyn tabystady.
Shara aıasynda arnaıy kitap kórmeleri jasaqtalyp, túrik eliniń ádebıeti men mádenıetine arnalǵan erekshe atmosfera qalyptasty. Sondaı-aq, “Dostardyń mahabbaty” kitabynda atalǵan túrik ulttyq taǵamdary — sımıt, pahlava, túrik kámpıtteri jáne basqa da táttilerden arnaıy shaǵyn fýrshet uıymdastyrylyp, qonaqtarǵa usynyldy. Bul dastarqan kórmesi kitaptaǵy mazmunmen sabaqtasyp, oqyrmandy shyǵarmanyń ishki álemine eliktire tústi.
Tusaýkeser rásimine Túrkistan qalalyq mádenıet úıiniń ónerpazdary qazaq, qyrǵyz jáne túrik tilderinde ásem ánder oryndap, keshtiń mazmunyn tereńdetip, rýhanı áserin arttyrdy. Kitaphana oqyrmandary «Dostardyń mahabbaty» kitabynyń mazmunyna negizdelgen áserli kórinis qoıyp, shyǵarmanyń ıdeıasy men tárbıelik mánin kórermenge tereń jetkize bildi. Sonymen qatar, Qoja Ahmet Iаsaýı atyndaǵy halyqaralyq qazaq-túrik ýnıversıtetiniń sýret óneri fakýltetiniń stýdentteri «Dostardyń mahabbaty» kitabynyń jelisi boıynsha sýretter salyp, shyǵarmanyń mazmunyn kórkem beıneleý arqyly keshtiń kórkin asha tústi.
Balalarǵa arnalǵan júrekke jyly, tárbıelik máni zor týyndynyń tusaýyn Muhıt Tólegenov, Aısulý Qasymbek, Jeńisbek Japekov jáne Rysbek Letaev kesip, shyǵarmanyń bolashaq oqyrmandaryna jol ashty. Bul sát – túrik jáne qazaq ádebıetiniń arasyndaǵy dostyq kópirin nyǵaıta túsken erekshe mádenı oqıǵa boldy.
Aıta keteıik: Gúljaz Qarybektiń túrik jazýshysy Fatma Gúnerden aýdarǵan «Dostardyń mahabbaty» atty balalarǵa arnalǵan shyǵarmasynyń jaryq kórýine Túrkistan oblystyq Y.Altynsarın atyndaǵy balalar kitaphanasynyń dırektory Rysbek Letaev demeýshilik kórsetip, kitaptyń jaryqqa shyǵýyna tikeleı qoldaý bildirdi. Bul ıgi is – balalar ádebıetine qosylǵan qundy úles qana emes, qos halyq arasyndaǵy rýhanı baılanysty nyǵaıtý jolyndaǵy mańyzdy qadam boldy.
Sharanyń qurmetti qonaqtary retinde QR-nyń Qurmetti Jýrnalısi, Halyqaralyq «Ajar» syılyǵynyń laýreaty Roza Narymbetova, QR-nyń Mádenıet maıtalmany Pernekúl Náltaeva, Q.A. Iаsaýı atyndaǵy Halyqaralyq qazaq-túrik ýnıversıtetiniń dosenti, teolog-ǵalym Muhıt Tólegenov, N.Ońdasynov atyndaǵy Túrkistan mamandandyrylǵan mektep-ınternatynyń qazaq tili men ádebıeti pániniń muǵalimi Uljan Joldasova, QR Bilim berý isiniń úzdigi, Jeneva BAO gonorar-dosenti, «Jahandyq quzyretter» oqý-ádistemeligi keshenderiniń avtory, áleýmettik ǵylymdar magıstri Aısulý Qasymbek, Q.A. Iаsaýı atyndaǵy Halyqaralyq qazaq-túrik ýnıversıteti, Jýrnalıstıka kafedrasynyń meńgerýshisi Balzııa Baeshova jáne «Túrkistan» telearnasynyń redaktory Marııam Ábsattar, Mádenıet salasynyń úzdigi, sýretshi, dızaıner Murat Shahanbaı sóz sóılep, sharaǵa óz oılary men jyly lebizderin bildirdi. Olar óz sózinde bul týyndynyń qos halyq arasyndaǵy dostyqty nyǵaıtyp, jas urpaqtyń rýhanı damýyna úles qosatynyn erekshe atap ótti.
Atalmysh sharaǵa Túrkistan oblysyna qarasty barlyq ortalyqtandyrylǵan kitaphanalar júıeleriniń dırektorlary men balalar kitaphanasynyń meńgerýshileri qatysty.
Shara sońynda Gúljaz Qarybek barsha qatysýshylarǵa, ásirese keshtiń mazmundy ótýine úles qosqan zııaly qaýym ókilderine shynaıy alǵysyn bildirip, qurmet retinde óz atynan estelik syı-sııapattar tabystady. Bul – avtordyń shyǵarmashylyq eńbegine qoldaý bildirgen barsha jandarǵa degen rızashylyqtyń belgisi boldy.
«Dostardyń mahabbaty» – túrik pen qazaq halyqtarynyń arasyndaǵy ádebı, mádenı baılanysty nyǵaıta túsetin mańyzdy aýdarma týyndy. Bul eńbektiń qazaq tiline aýdarylýy – qos halyqtyń rýhanı kópirin jalǵaıtyn eleýli qadamdardyń biri.
Kesh sońynda oqyrmandar avtorǵa óz alǵystaryn bildirip, kitapqa qoltańba alý qurmetine ıe boldy