11–19 qazan aralyǵynda Almatyda «ATR 250 Almaty Open» týrnıri ótedi. Qazirdiń ózinde birqatar tanymal tennısshilerdiń osy jarysqa qatysatyny belgili bolyp otyr. Baq synaýshylar qatarynda reseılik Danııl Medvedev pen Karen Hachanov, grekııalyq Stefanos Sısıpas, elimizdiń birinshi raketkasy Aleksandr Býblık, taǵy basqa sańlaqtar bar.
Týrnırdiń tusaýy 2020 jyly Astanada kesildi. Sol jarystyń fınalynda aýstralııalyq Djon Mıllman men fransııalyq Adrıan Mınnarıno kezdesip, alǵashqysy 7:5, 6:1 esebimen jeńiske jetti. Kelesi jyly Ońtústik Koreıanyń ókili Kvon Sýn-Ý men Aýstralııadan kelgen Djeıms Davkort bas júldeni ózara sarapqa saldy. Bul tartysta azııalyqtyń asyǵy alshysynan tústi. 2020 jyly Novak Djokovıchke teń keler eshkim tabylmady. Ataǵy jer jarǵan Serbııanyń sańlaǵy sheshýshi básekede Stefanos Sısıpasqa san soqtyrdy. 2023 jyly Adrıan Mınnarınonyń asyǵy alshysynan tústi. Fınalda ol Sebastıan Kordany qapy qaldyrdy.
Sol jyldary ótken juptyq saıystarda Sander Jılle/Ioran Flıgen (Germanııa), Santıago Gonsales (Meksıka)/Andres Moltenı (Argentına), Nıkola Mektıch/Mate Pavıch (Horvatııa), Natanıel Lemmons/Djeson Ýıtroý (AQSh) jeńimpaz atandy. 2021 jyly áıelder arasynda da jarys uıymdastyrylyp, belgııalyq Elıson van Ýıtvank teńdessiz dep tanyldy. Fınalda ol bizdiń Iýlııa Pýtınsevadan basym tústi.
Byltyrdan beri «ATR 250 Almaty Open» degen ataýǵa ıe bolǵan týrnır Alataý baýraıynda óte bastady. Karen Hachanov fınalda kanadalyq Gabrıel Dıallony utty. Esep – 6:2, 5:7, 6:3. Erlerdiń juptyq syny Úndistannyń úzdikteri Rıtvık Choýdarı Bollıpallı/Ardjýn Kadheniń jeńisimen aıaqtaldy.
Bıyl da álemniń birqatar memleketinen kelgen ataqty tennısshiler Almatyǵa keledi. Solardyń qatarynda byltyrǵy jarystyń jeńimpazy K.Hachanov ta bar. 29 jastaǵy Máskeýdiń týmasy bul kúnderi TOP-10-dyqty túıindep tur. Ol AQSh pen Aýstralııanyń ashyq birinshilikteriniń jartylaı fınalynda oınady. ATR týrnırlerin jeti ret utyp, 2021 jyly Tokıo Olımpıasynda kúmis medalǵa ıe boldy.
K.Hachanovpen túıdeı qurdas Danııl Medvedev qazirgi kezde álemdik reıtıngte 18-orynda. Kezinde úzdikter kóshin bastaǵan máskeýlik ATR-diń 20 týrnırinde top jarǵan. 2021 jyly US Open-di utty. Úsh ret Aýstralııanyń ashyq birinshiliginiń fınalyna deıin jetti.
26 jastaǵy Stefanos Sısıpas ATR dodalarynda 12 ret bas júldeni oljalap, osydan birer jyl buryn álemniń úshinshi raketkasy atandy. Melbýrn men Parıjdegi «Úlken dýylǵa» sanatyndaǵy jarystardyń fınalynda oınady. Qazirde grek tennısshisi ATR reıtınginde 28-orynda tur.