AQSh-ta belgili konservatıvti bloger jáne saıasatker Charlı Kırk oqqa ushty. Ol Iýta shtatynyń Utah Valley University ýnıversıtetinde ótken «American Comeback Tour» atty sapary kezinde jaralanyp, aýrýhanada kóz jumdy. Oqıǵaǵa shamamen 3 myńǵa jýyq adam kýá boldy, dep jazady Egemen.kz.
Oqıǵa qalaı boldy?
Iýta shtatynyń qoǵamdyq qaýipsizdik departamentiniń habarlaýynsha, oq 12:20 shamasynda (Astana ýaqytymen 01:20) atylǵan. Aldyn ala derekter boıynsha, shabýylshy ýnıversıtet kampýsynyń ishki alańyna jaqyn mańdaǵy ǵımarattyń shatyrynan oq jaýdyrǵan.
Kırk moıyn tusynan jaralanyp, aýrýhanaǵa aýyr halde jetkizildi. Degenmen kóp uzamaı AQSh prezıdenti Donald Tramp onyń qaza tapqanyn rastady. CNN-niń habarlaýynsha, atys sátinde Charlı Kırk aýdıtorııadan túsken suraqqa jaýap berip turǵan.
Charlı Kırk kim edi?
1993 jyly 14 qazanda Illınoıs shtatynda dúnıege kelgen Kırk AQSh-taǵy konservatıvti qozǵalystyń aldyńǵy qatarly ókilderiniń biri boldy. Ol Donald Tramptyń seriktesi ári Make America Great Again qozǵalysynyń belsendi qoldaýshysy retinde tanyldy.
Charlı Kırk – Turning Point USA uıymynyń negizin qalaýshylardyń biri. Bul uıym jastarǵa erkin naryq, qarjylyq jaýapkershilik jáne memlekettiń shektelgen aralasýy ıdeıasyn nasıhattaıdy. Qazirgi tańda uıymnyń bólimsheleri AQSh-taǵy 850-den astam kolledjde jumys isteıdi.
Kırk túrli ýnıversıtetterde jıi sóz sóılep, podkast júrgizip, áleýmettik jelilerde mıllıondaǵan aýdıtorııa jınady. Ol Ýkraınaǵa berilip jatqan áskerı kómekke qarsy pikir bildirip, ımmıgrasııa, LGBT-qozǵalysy jáne genderlik saıasatty synady.
BBC jazǵandaı, onyń qyzmeti ásirese Arızona shtatynda respýblıkalyq saılaýshylardy jumyldyrýda mańyzdy ról atqardy. Kırk Aq úıge jıi baryp, osy jyldyń qańtarynda Donald Tramptyń ınaýgýrasııasyna qatysqan.
Tergeý men zertteý
Alǵashynda polısııa kúdikti retinde basqa adamdy ustaǵanymen, keıin ol oqıǵaǵa qatysy joq ekeni anyqtaldy. FBR dereginshe, negizgi kúdikti qolǵa tústi. Qazir federaldyq organdar men Iýta shtatynyń quqyq qorǵaýshylary birlesip tergeý júrgizip jatyr.
Qaza tapqan blogerdi eske alý sharalary eldiń birneshe óńirinde ótti. Arızonada dinı uıymdar men jergilikti turǵyndar duǵa oqyp, Nıý-Iork Yankees beısbol komandasy oıyn aldynda bir mınýt únsizdik jarııalady. Kongresste de Charlı Kırkti eske alýǵa arnalǵan únsizdik sáti ótkiziledi.
Donald Tramp búkil el aýmaǵynda jeksenbige deıin memlekettik jalaýlardy tómen túsirýge tapsyrma berdi.
«Eshkim jastardy Charlı sekildi túsinip, olarǵa qamqor bola alǵan joq. Biz ony súıdik hám súıip ótemiz», dedi Tramp Truth Social paraqshasynda.
Al burynǵy prezıdent Djo Baıden mundaı qandy oqıǵalardyń AQSh-ta toqtaýy qajettigin aıtyp, Kırktiń otbasyna kóńil aıtty. Iýta shtatynyń gýbernatory bul oqıǵany «saıası qylmys» dep baǵalady.
Eske sala keteıik, ótken jyly Donald Tramptyń ózine de qastandyq jasalǵan bolatyn.