4 qyrkúıekte Býrabaı ulttyq parkinde «Taza orman» atty ekologııalyq aksııa ótti. Is-shara Ortalyq Azııanyń Turaqty Damý Qory Creative Innovation Institute bastamasymen, Bolektaý taýyna jańa ekotropanyń tanystyrylymy qarsańynda uıymdastyryldy, dep habarlaıdy Egemen.kz.
Is-sharaǵa «Býrabaı» ulttyq parkiniń ákimshiligi, Aqmola oblysy ákimdiginiń ókilderi, Shýchınsk qalasyndaǵy Orman sharýashylyǵy, ekologııa jáne týrızm joǵary kolledjiniń stýdentteri, Aımaqtyń týrıstik kompanııalary qatysty.
Aksııa aıasynda aýqymdy tazalaý jumystary júrgizildi: Bolektaý taýyna bastaıtyn joldyń eteginen shyńyna deıin jáne oǵan jaqyn aýmaqtar turmystyq qaldyqtardan tolyq tazartyldy. Bul shara «Taza Qazaqstan» ulttyq bastamasyn júzege asyrýǵa jáne elimizdiń tabıǵı baılyǵyn saqtaý isine qatysýshylardyń naqty úlesin kórsetti.
«Biz úshin tabıǵat aıasyndaǵy árbir qadam tek shabyt kózi ǵana emes, jaýapkershilikpen de baılanysty bolýy mańyzdy. Bolektaý — bul jaı ǵana týrıstik nysan emes, ol — tiri ekojúıe. Mundaı aksııalar tabıǵatqa qamqor bolýdy ómir salty retinde qabyldaıtyn jańa býyndy tárbıeleýge kómektesedi», dedi Creative Innovation Institute-tiń turaqty damý jónindegi sarapshysy Aleksandra Harıtonova.
Is-sharaǵa stýdentterdiń belsendi qatysýy — ekologııa jáne týrızm salasynyń bolashaq mamandary úshin tájirıbelik sabaq boldy. Bul — jastar men jergilikti turǵyndar arasynda tabıǵatqa qamqorlyq mádenıetin qalyptastyrýdyń jarqyn mysaly.
«Maǵan tabıǵatqa kómektesý ertegilerde ǵana emes, shynaıy ómirde de unaıdy. Bolektaý jobasyna qatysyp jatqanyma qýanyshtymyn — biz birge álemdi taza ári ádemi etip jatyrmyz!», deıdi ClimateTech-jańashyl jáne ekologııalyq ertegilerdiń avtory Platon Nechaev.
Uıymdastyrýshylardyń pikirinshe, mundaı bastamalar ekologııalyq tepe-teńdikti saqtaý úshin ǵana emes, azamattardyń ekologııalyq sanasyn arttyrý úshin de asa qajet. Jaqyn arada Bolektaý ekotropasynyń resmı tanystyrylymy ótedi — bul joba óńirdiń ekotýrıstik ınfraqurylymynyń bir bóligine aınalmaq.