Baltabek Látippaıuly men Zibaıda Zeınollaqyzy Jahııanovtar tórt baladan on bes nemere, bir shóbere súıip otyrǵan baqytty ata-áje. Elý jyldan beri ómirdiń ystyq-sýyǵyn qol ustasyp birge eńserip kele jatqan erli-zaıyptylardyń ómir joly kópke úlgi.
Qazir olar Aqtóbe qalasynyń irgesindegi «Aqjar-2» turǵyn úı alabynda úlken uly О́mirbektiń otbasymen birge turady. Zibaıda apaı О́mirbek pen Samaldyń alty balasyna da baǵdar berip, kelinine qolǵabys jasaýdan jalyqqan emes. Biletinder osy úıdiń balalaryn kez kelgen jumystan qashpaıtyn, eńbekqor, tyndyrymdy, qaıyrymdy dep baǵalaıdy. Rasynda da Baltabek aǵaı men Zibaıda apaıdyń bala tárbıesindegi ustanymy – adal eńbekpen tabys tabý. Osy qaǵıda ákeden balaǵa jalǵasyp, odan nemerege aýysyp barady.
Baltabek aǵaı men Zibaıda apaıdyń ómir joly bir qaraǵanda qarapaıym sııaqty kórinse de, mazmunǵa toly. Otaǵasy 1970 jyly Qarabutaq aýdanynyń Aqkól aýyldyq mektebin bitirgen soń eńbek jolyn mehanızatorlyqtan bastaǵan. Traktor tizgindegen jigit keńshardyń shóbin de shapty, otyn-sýyn da tasydy. 1975 jyly Aqkólde saýynshy bolyp eńbek jolyn bastaǵan Zibaıda Zeınollaqyzymen shańyraq qurdy.
1980–1990 jyldary keńsharda 15 myń bas iri qara bolǵan eken. Jeri qunarly, shóbi shúıgin, sýy mol jerde aýyldyń barlyq adamyna jumys tabylyp, tabysty sharýashylyqqa aınalǵan. Keıin Zibaıda apaı aýdannyń balabaqshalaryna keńshardan jańa saýylǵan sút jetkizýmen aınalysty. Eki ul, eki qyz ósirip jetkizip, 2016 jyly zeınetkerlikke shyqty. Baltabek aǵaı 1978–1993 jyldar aralyǵynda keńshar taraǵansha malshy bolyp eńbek etti. 2005 jyly Aqtóbe qalasyna otbasymen kóship keldi. 2018 jyly zeınet demalysyna shyqty.
Baltabek aǵaı jańa otaý kótergen jastardy tatý bolýǵa úndep otyrady. «Úı bolǵan soń ydys-aıaq syldyrlamaı turmaıdy. Janjal týsa, ashýdy sabyrǵa, aqylǵa jeńdirgen jón. Otaǵasy – er adam úıdegi usaq-túıekti tizbeı, áıel-balasynan kemshilik izdemeı, jumys istep, otbasyn asyraýdy oılaýy kerek. Er-azamat túzdiń sharýasyn úılestirse, úıdiń sharýasyn úıirip, bala tárbıesimen aınalysatyn – áıel ana. Shańyraqtyń bereke-birligi ananyń qolynda. Aqyldy áıel aǵaıyndy tabystyryp, yntymaq-berekede ustap, balalardy týystarymen jaqyndastyrady. Meniń aıtpaǵym, erli-zaıyptylar bir-birinen kemshilik izdemeı, jamanyn jasyryp, jaqsysyn asyrsa ıgi. Áke-shesheniń syılastyǵyn kórgen bala da kórgenin qaıtalaıdy», deıdi úlken áýlet ıesi.
Aqtóbe oblysy