Memleket basshysy Qasym-Jomart Toqaev Qazaqstan halqyn Otbasy kúnimen quttyqtady. Bul týraly Aqorda málim etti, dep habarlaıdy Egemen.kz.
«Barshańyzdy Otbasy kúnimen shyn júrekten quttyqtaımyn! Bul — ultymyzdy meıirim men qamqorlyq, ózara qoldaý men azamattyq jaýapkershilik sııaqty myzǵymas qundylyqtar aıasynda uıystyratyn tamasha mereke. Otbasy — halqymyz úshin qasıetti uǵym. Ár adam, eń aldymen, óziniń qasterli shańyraǵynda tulǵa retinde qalyptasady, úlgi-ónege alyp, naǵyz azamatqa tán ıgi qasıetterdi boıyna sińiredi», – dedi Toqaev.
Onyń sózinshe, otbasynda kórgen tálim-tárbıeniń arqasynda elimizde otanshyl, eńbekqor, bilimdi jáne mádenıetti urpaq ósip shyǵady.
«Sondyqtan biz bárimiz bir el bolyp halqymyzdyń salt-dástúri men qazirgi zamandaǵy ozyq kózqarasy úılesim tapqan otbasy qundylyqtaryn saqtap, ony nyǵaıtyp, jan-jaqty nasıhattaýymyz kerek. Jaryq ómir syılaǵan ata-analarymyzǵa zor qurmetpen qaraý — qasterli paryz. Ásirese, aıaly alaqanymen, aqyl-parasatymen árbir úıdi shýaqqa bóleıtin analardyń orny erekshe. «Ana — Jer-Ana» — adamzat órkenıetiniń ózegi. Biz asqar taý ákelerimizdiń tabandy eńbegi men eren erligine bas ıip, qadir tutýymyz kerek», – delingen quttyqtaýda.
Ol ár shańyraqta yrys-yntymaq bolsa, elimiz de qarqyndy damıtynyn aıtty.
«Bul — Ádiletti jáne Qýatty Qazaqstan qurýdyń asa mańyzdy sharty. Sondyqtan memleket otbasy qundylyqtaryn keńinen dáriptep, ana men bala quqyǵyn qorǵaýǵa aıryqsha mán beredi. Ár shańyraq baq-berekege tolsyn! Barsha otandastarymyzǵa zor densaýlyq, mol tabys tileımin», — delingen Prezıdent quttyqtaýynda.