Qazaqstannyń 20 óńirinde jasandy ıntellekt taqyrybyna arnalǵan «Decentrathon 4.0» hakatony ótip jatyr. Aýqymdy is-shara IT salasyna qyzyǵýshylyǵy bar jastardy bir arnaǵa toǵystyrdy, dep jazady Egemen.kz.
Shymkent Hub ortalyǵynda da daryndy jastar bas qosyp, baq synaýda. Ortalyqtyń aımaqtyq menedjeri Qurmanǵazy Muratovtyń aıtýynsha, kezekti hakatonǵa IT salasyna qyzyǵýshylyǵy bar 171 komanda qatysýda.
— Qatysýshylar jasandy ıntellekt pen blokcheın taqyryptary boıynsha tapsyrmalardy oryndap, jańa jobalar usynýy tıis. Olar ózekti máselelerdiń tyń sheshimderin, ınnovasııalyq ıdeıalaryn tanystyrýy kerek, — dedi ol.
Baıqaýdyń jalpy júlde qory 50 myń AQSh dollaryn quraıdy.
Buǵan deıin Shymkentte Orta Azııada alǵash ret álemdik blokcheın ındýstrııasynyń eń iri hakatondarynyń biri — Decentrathon 2 ótken bolatyn. Qalalyq sıfrlandyrý basqarmasynyń qoldaýymen keıingi jyldary túrli forýmdar men is-sharalar uıymdastyrylyp keledi.
Kezekti hakaton IT salasyn damytýǵa, jastardyń shyǵarmashylyq áleýetin arttyrýǵa óz septigin tıgizbek.