Úkimet otyrysynda Premer-mınıstr Oljas Bektenov óńir ákimdikterine Ishki ister mınıstrligimen birlesip, eldi mekenderde jol erejesin buzý faktilerin tirkeıtin kameralar sanyn arttyrýdy tapsyrdy, dep jazady Egemen.kz.
Sonymen qatar respýblıkalyq mańyzy bar joldarda apparattyq-baǵdarlamalyq keshenderdi, pılotsyz ushý apparattaryn belsendi paıdalaný usynyldy.
«Sondaı-aq jaıaý júrginshilermen profılaktıkalyq jumysty kúsheıtińizder. Bıyldyń ózinde olar 500-den astam jol-kólik oqıǵasyna sebepshi boldy. Sondyqtan qatań sharalar qoldanylýy kerek. Oqý-aǵartý jáne Ishki ister mınıstrlikteri mektepterde mindetti túrde jol erejesi boıynsha sabaq ótkizý qajettigin taǵy da esterińizge salamyn», dedi Úkimet basshysy.
Premer-mınıstr joldardy mobıldi baılanyspen qamtý qarqynyn jedeldetý jaıyna da toqtaldy.
«Taǵy bir másele – qala syrtyndaǵy joldarda mobıldi baılanystyń nashar bolýy. Biz bul týraly kópten beri aıtyp kelemiz biraq esh nátıje joq. Máselen, «Almaty – Bishkek», «Almaty – Taldyqorǵan» joldarynyń ınternetpen qamtylǵanyna qaramastan, kólik júrgizýshileri uıaly baılanys pen ınternet ustamaıtyn aımaqtardyń bar ekenin aıtyp, jıi shaǵymdanady. Jol apattary kezinde zardap shekkender kómek qyzmetterin shaqyrta almaıdy. Sıfrlandyrý mınıstrligi joldardy mobıldi baılanyspen qamtý qarqynyn jedeldetýi qajet», dedi Oljas Bektenov.