Úndistannyń Ámbıkapýr qalasynda «Garbage Café» atty erekshe dámhana bar. Munda kelýshiler túski asty aqshaǵa emes, bir kılo plastık qoqysqa satyp alady. Al 500 gramm plastıkke jeńil as beriledi.
Ámbıkapýr búginde ózin «qoqys alańy joq qala» retinde tanytqan. Bul jetistikke 50 myńnan astam áıeldiń jergilikti kásiporyndarda eńbek etýi de yqpal etken. Munda qaldyqtar túgel derlik suryptalyp, qaıta óńdeýge jiberiledi. Dámhana basshysy Vınod Pateldiń aıtýynsha, olardyń ashanasyna kún saıyn 20 shaqty adam keledi. Bul shamamen 20 kılo plastık qoqys jınalady degen sóz. «Eger plastıktiń ornyna tamaq beriletin bolsa, biz tek ash qaryndardy ǵana toıdyrmaı, qorshaǵan ortany tazartýǵa da úles qosamyz», deıdi ol. Mundaı tájirıbe Úndistannyń ózge qalalarynda da júzege asyp jatyr.