Búginnen bastap Qazaqstan Respýblıkasy Qylmystyq kodeksine dropperlik úshin jaýapkershilikti qarastyratyn jańa 232-1-baby engizildi, dep jazady Egemen.kz.
Dropperlik áreket retinde bank shotyna, tólem nemese sáıkestendirý quraldaryna zańsyz qol jetkizý, ony berý nemese alý, sondaı-aq zańsyz tólemder men aqsha aýdarymdaryn júzege asyrý, onyń ishinde materıaldyq syıaqy úshin úshinshi tulǵalarǵa bank kartasyn berý sanalady.
Bul áreket ınternet-alaıaqtyqtyń negizgi ádisteriniń biri jáne urlanǵan qarajatty qolma-qol aqshaǵa aınaldyrý men shyǵarý úshin qoldanylady.
Is-árekettiń aýyrlyǵyna, sıpatyna jáne alynǵan paıda mólsherine qaraı 232-1-bap aıyppuldan bastap, múlikti tárkileı otyryp 7 jylǵa deıin bas bostandyǵynan aıyrý jazasyn qarastyrady. Atalǵan norma kıberalaıaqtyqqa qarsy júıeli kúresti, azamattardyń qarjylyq qaýipsizdigin nyǵaıtýdy jáne sıfrlyq ortada áreket etetin qylmystyq toptardyń qyzmetin toqtatýdy kózdeıdi.