Memleket basshysy Aqmola oblysynyń Zerendi aýdanynda aımaq sharýalarymen egin jınaý naýqanyna arnalǵan keńeste jınalǵan ónimdi tıisinshe saqtaý mańyzdy mindettiń biri ekenin atap ótti, dep jazady Egemen.kz.
Prezıdent óz sózinde ártúrli daqyldardy ósirýdiń jospardaǵy kólemi men ár daqylǵa jeke qoıma qajet ekenin eskerip, mundaı oryndardyń tapshylyǵy baıqalatynyn aıtty.
«Zamanaýı elevatorlardy salýǵa jáne olardy ustap turýǵa qomaqty ınvestısııa qajet ekeni anyq. Sondyqtan elevatorlardy jańǵyrtý úshin jeńildetilgen qarjylandyrýdyń arnaıy baǵdarlamasyn iske qosý kerek. Sapaly tuqym daıyndaýǵa basa nazar aýdarǵan jón. Budan bólek, otandyq naryqty ózimizde shyǵarylǵan tuqymmen qamtamasyz etýdiń naqty qadamdary kerek. Byltyrdan bastap jetildirilgen mıneraldy tyńaıtqyshtardy sýbsıdııalaý tetigi tıimdiligin kórsetti. Aýyl sharýashylyǵy mınıstrliginiń aldynda tuqym óndirisi boıynsha memlekettik qoldaýdyń balamaly sharalaryn engizý mindeti tur. Jalpy, egin sharýashylyǵynda jaqsy nátıjege qol jetkizgenimizdi atap ótken durys. Bul aýyl sharýashylyǵynyń aralas salalaryna oń áser etip otyr», dedi Qasym-Jomart Toqaev.
Memleket basshysy aýyl sharýashylyǵyna sıfrlyq tehnologııany tezdetip engizýdi tapsyrdy. Sonymen qatar Prezıdent mal sharýashylyǵynyń áleýetin tolyq tanytýǵa shaqyrdy.
«Jyl sońyna deıin mal sharýashylyǵyn damytý baǵdarlamasy ázirlenedi. Bul qujat uzaq merzimge jeńildetilgen qarajat alýǵa múmkindik beredi. Biz tek jappaı sıfrlandyrý arqyly ekonomıkanyń barlyq salasynda ashyqtyq pen tıimdilikti qamtamasyz ete alamyz. Men bul máselege Joldaýda jan-jaqty toqtaldym. Aýyl sharýashylyǵyna sıfrlyq tehnologııany tezdetip engizý kerek. Egin jáne mal sharýashylyǵyndaǵy úderisterdi tolyq qadaǵalap otyrý úshin sıfrlyq tásilderdi qoldaný qajet. Bul jumysty IT-bıznespen birlese otyryp atqarǵan jón», dedi Prezıdent.
Keńeste Qasym-Jomart Toqaev aýyl sharýashylyǵyn damytýǵa bıýdjetten qomaqty qarajat bólinip jatqanyna da toqtaldy.
«Demek istelip jatqan árbir jumystyń, árbir sharanyń naqty nátıjesi bolýǵa tıis. Bir sózben, aýyl sharýashylyǵyna oń yqpal etýi kerek. Memleket adal jumys isteıtin dıqandarǵa árdaıym qoldaý kórsetedi. Aýyl sharýashylyǵynyń jaı-kúıi meniń erekshe baqylaýymda, bul salaǵa basa mán beremin. «Jumyla kótergen júk jeńil» deıdi bizdiń halqymyz. Sondyqtan birlese otyryp, osy mańyzdy naýqandy ýaqytynda jáne tabysty aıaqtaımyz dep senemin», dedi Memleket basshysy.
Jıynda Aýyl sharýashylyǵy mınıstri Aıdarbek Saparov, Aqmola oblysynyń ákimi Marat Ahmetjanov, «Rodına» agrofırmasynyń bas dırektory Ivan Saýer, Qostanaı oblysynyń ákimi Qumar Aqsaqalov, «Qarasý-Astyq» jaýapkershiligi shekteýli seriktestigi dırektorlar keńesiniń tóraǵasy Almat Tursynov, Soltústik Qazaqstan oblysynyń ákimi Ǵaýez Nurmuhambetov, «Zenchenko jáne K» KS dırektory Gennadıı Zenchenko, Pavlodar oblysynyń ákimi Asaıyn Baıhanov, «Galıskoe» jaýapkershiligi shekteýli seriktestiginiń dırektory Aleksandr Kasısın sóz sóıledi.