Álemdik jáne dástúrli dinder lıderleriniń XXIII Hatshylyǵy men VIII sezi qarsańynda Qytaı Býddıstik assosıasııasy tóraǵasynyń orynbasary Szın Bo Qazaqstannyń mádenıetaralyq yntymaqtastyq pen rýhanı dıalogtyń ortalyǵy retindegi rólin erekshe atap ótti, dep jazady Egemen.kz.
Szın Bo búgingi Qazaqstan – tarıhı saýda joldarynyń toraby ǵana emes, «dombyra men gıtara, arfa» únin úndestirip, mádenı birliktiń sımvoldyq sımfonııasyn jasaıtyn keńistik ekenin aıtty. Ol «Bir beldeý, bir jol» bastamasyna erekshe nazar aýdaryp, jobanyń Qazaqstannyń mádenı jáne rýhanı almasý platformasy retindegi rólin kúsheıtkenin atap ótti.
«Bul oqıǵalar órkenıetterdiń ózara baıytylýy tarıhynda jańa paraq ashyp, ózara qurmet pen ashyqtyq rýhyn kórsetti. Bul forým taqyrybyna tolyq saı keledi», dedi ol.
О́z sózinde Szın Bo túrli dinderdiń rýhanı dástúrleri arasynda uqsastyqtarǵa toqtaldy. Ol býddızmdegi barlyq qubylystyń ózara táýeldiligi, hrıstıandyqtaǵy jaqynǵa degen súıispenshilik, ıslamdaǵy tózimdilik pen meıirimdilik, sondaı-aq daosızmdegi qalyptasqan jolǵa ilesý qaǵıdalaryn eske saldy. Onyń pikirinshe, munyń bári dinaralyq dıalogqa myqty negiz bola alady.
Sonymen qatar ol dinı konfessııa lıderlerin yntymaqtastyqty tereńdetýge, jastar tárbıesin talqylaýǵa, otbasy men moraldyq qundylyqtardy nyǵaıtýǵa, rýhanı danalyqpen bólisýge jáne mádenı jobalar aıasynda birlesip jumys isteýge shaqyrdy. Ásirese klımattyń ózgerýi, ashtyq jáne qaqtyǵystar sııaqty jahandyq syn-qaterlerge nazar aýdarý qajet ekenin aıtty.
«Dinı qaýymdastyq tek sózben shektelmeı, naqty áreket etýi tıis – ıgi oılardy shynaıy isterge aınaldyrý qajet. Úmit otyn jaǵyp, bos sózdi doǵaryp, rýhanı energııany beıbitshilikke jumsaý kerek», dep atap ótti ol.
Szın Bo óz sózin sezdiń sátti ótýine tilektestik bildirip, Qytaı Býddıstik assosıasııasynyń álemdik dindermen birge ilgeri basýǵa daıyn ekenin jetkizdi.
«Yntymaqty qaıyq etip, senimdi jelken etip, al áreketti eskek etsek – beıbit ári baqytty bolashaqqa jete alamyz», dedi Szın Bo.