2-4 qazan kúnderi Astanada Digital Bridge 2025 halyqaralyq forýmy ótedi. Bul is-sharada jasandy ıntellekt, sıfrlyq transformasııa, venchýrlyq kapıtal, ǵylym men bilim salasynyń álemdik sarapshylary bas qosyp, ózara pikir almasady, dep jazady Egemen.kz.
Forým Generative Nation tujyrymdamasy aıasynda uıymdastyrylyp otyr. Bul – Qazaqstannyń jańa tehnologııalarǵa negizdelgen bilimdi qoǵam qurýǵa jáne adam kapıtalyn damytýǵa baǵyttalǵan strategııalyq ustanymynyń aıǵaǵy.
Forýmnyń basty qonaqtarynyń biri – Birikken Arab Ámirlikteriniń jasandy ıntellekt jónindegi mınıstri Omar Ál-Olama. Ol 2017 jyldan beri eldiń sıfrlyq saıasat baǵytyna jaýapty jáne 2023 jyly Time jýrnalynyń «AI salasyndaǵy eń yqpaldy 100 tulǵa» tizimine engen. Onyń memlekettik sıfrlyq strategııa qurýdaǵy jáne halyqaralyq yntymaqtastyq ornatýdaǵy tájirıbesi Digital Bridge 2025 pikirtalastaryna tyń serpin beredi.
Jasandy ıntellektiń bolashaǵy taqyrybyn álemge tanymal fýtýrolog, Sinovation Ventures venchýrlyq qorynyń negizin qalaýshy ári 01.AI kompanııasynyń bas dırektory Kaı-Fý Lı jalǵastyrady. Buǵan deıin ol Google China-ny basqarǵan, Microsoft Research Asia ortalyǵyn qurýǵa atsalysqan. «AI 2041» atty kitaby álemdik bestsellerge aınalǵan ol endi forýmda jasandy ıntellektiń erteńimizge yqpaly jónindegi óz kózqarasyn ortaǵa salady.
Sonymen qatar Stenford bıznes mektebiniń professory, venchýrlyq kapıtal jónindegi bedeldi zertteýshi Ilıa Strebýlaev tehnologııalardyń jahandyq ekonomıkaǵa áseri týraly áńgimeleıdi. Onyń ǵylymı eńbekteri álemdik basylymdarda jarııalanyp, ǵylymı ıdeıalardyń tabysty bızneske qalaı aınalatynyn dáleldep keledi.
Forým tek dástúrli taqyryptarmen shektelmeıdi. Aǵylshyn fýtbolynyń ańyzy Sol Kempbell sporttaǵy jasandy ıntellektiń qoldanysy týraly oıymen bólisedi. Al kompıýterlik ǵylymnyń klassıkteri – áıgili ǵalym Pıter Norvıg pen Tıýrıng syılyǵynyń laýreaty Djon Hopkroft jasandy ıntellekt pen algorıtmderdiń bolashaǵy jaıly áńgime órbitedi.
Digital Bridge búginde óńirdegi eń aýqymdy IT is-shara retinde tanyldy. Alty jyldyń ishinde forým 100 elden 67 myńnan astam qatysýshynyń basyn qosyp, myńnan asa spıker men 550 memlekettik jáne halyqaralyq uıym ókilderin bir alańǵa jınady. Bıyl forým alǵash ret tolyq kommersııalyq negizde, bıýdjet qarajatynsyz ótedi. Kez kelgen adam bılet satyp alyp, jyldyń basty tehnologııalyq oqıǵasyna qatysa alady. Bıletter digitalbridge.kz saıtynda qoljetimdi.
Digital Bridge 2025 forýmyn ótkizý seriktester qoldaýynyń arqasynda múmkin boldy. Forýmnyń bas seriktesi – Freedom Bank Kazakhstan. Altyn seriktester – Kaspi.kz jáne Yandex Qazaqstan, qola seriktes – BI Group. Tehnologııalyq seriktester – IEC Telecom Kazakhstan jáne Bıtrıks24.
Forýmdy Astana Hub halyqaralyq ınnovasııalyq klasteri QR Sıfrlyq damý, ınnovasııalar jáne aeroǵarysh ónerkásibi mınıstrligi jáne Astana qalasy ákimdigimen birlesip uıymdastyrady.