Jańa oqý jyly bastalǵaly Jambyl oblysy tragedııa oshaǵyna aınaldy. Eki aptanyń ishinde kámelet jasyna tolmaǵan jasóspirimder arasynda úsh birdeı qaıǵyly oqıǵa tirkeldi, dep habarlaıdy Egemen.kz.
Jasóspirimder arasynda asa aýyr qylmystyń jıilep ketýine baılanysty shuǵyl keńes ótkizgen óńir basshysy Erbol Qarashókeev qaramaǵyndaǵy birneshe laýazymdy tulǵaǵa tártiptik jaza qoldandy.
О́ńir basshysy oqý jyly bastalǵaly oryn alǵan oqıǵalarǵa baılanysty oblys ákiminiń orynbasary Serik Sálemovke sógis, Taraz qalasynyń ákimi Baqytjan Orynbekovke, Shý aýdanynyń ákimi Baqytjan Jánibekovke, oblystyq bilim basqarmasynyń basshysy Nurbek Orshybekovke, Taraz qalasy ákiminiń orynbasary Ulana Slambekova men Shý aýdany ákiminiń orynbasary Naıman Sultanbaevqa qatań sógis túrindegi tártiptik shara qoldaný úshin oblys ákimi apparatyna tapsyrma berdi. Sondaı-aq oblystyq bilim basqarmasynan Taraz qalalyq jáne Shý aýdandyq bilim bólimderiniń basshylarynyń jáne ózge de jaýapty tulǵalardyń atqaryp otyrǵan qyzmetine sáıkestigin qarastyrýdy talap etti.
Oblys ákimi jasóspirimder arasyndaǵy qylmystyń aldyn alý boıynsha shuǵyl zerdeleý tobyn quryp, ár bilim berý mekemesinde keńeıtilgen saýalnama júrgizip, onyń nátıjesi boıynsha tıisti jumystardy jedel uıymdastyrýdy mindettedi.
Bul qurylatyn top óńirdegi barlyq mekteptiń joǵary synyp oqýshylary men kolledj stýdentteriniń quqyqtyq saýattylyǵyn arttyrýǵa, qylmystyń saldary men zardabyn túsindirýge kúsh salýy tıis. Top jetekshisi retinde Taraz qalasy jáne aýdan ákimderi jeke jaýap beretin bolady.