Yrǵyz eldi mekeninde aýdannyń 180 jyldyǵyna baılanysty birneshe is-shara ótti. Tarıhı mekenge arnalǵan ǵylymı konferensııada HIH–HH ǵasyrdaǵy tarıhı oqıǵalardy, túrli zulmat kezeńderin bastan ótkergen Yrǵyzdyń esimderi eskerýsiz qalǵan tulǵalary týraly zertteýlerin baıandasa, memleket qaıratkeri Uzaqbaı Qulymbetovtiń qyzy, Yrǵyz aýdanynyń qurmetti azamaty, Almatydan kelgen 93 jastaǵy Orynsha Qarabalına Ybyraı Altynsarın mektebinen túlep ushqan Yrǵyz arystary jóninde tebirene sóıledi.
Aqtóbe oblysy ákiminiń orynbasary Asylbek Esenbaev sońǵy úsh jylda Yrǵyz aýdanynda iske asyrylǵan jobalar jóninde baıandady. Aıtýynsha, óńirge 40 mlrd teńgege jýyq ınvestısııa tartylyp, 12 mıllıard teńge kóleminde qurylys jumysy júrgizilgen. Onyń dáleli, jańadan boı kótergen mektepter men balabaqshalar, jańartylǵan joldar men ınfraqurylymdar. Aýdanda aýyl sharýashylyǵy men shaǵyn kásipkerlik nysandary boı kóterip, turǵyndardyń turmys deńgeıi jaqsarǵan. Taǵy bir artyqshylyǵy, keıingi jyldary eń shalǵaı aýyldary – Nura, Amankól, Jarmaǵa tabıǵı gaz jetkizildi.
«Kúni keshe jarııalanǵan Memleket basshysy Joldaýynda Úkimetke Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysyn bastaýdy tapsyrdy. Bul bastama – tek ınfraqurylym emes, Yrǵyz aýdanynyń damýyna da jańa tynys beredi», dedi óńir basshysynyń orynbasary.
Is-shara sońynda tolyqtyrylyp, qaıta shyǵarylǵan «Yrǵyz» ensıklopedııasynyń tusaýkeseri ótti. Is-shara uzaq jyldan beri Yrǵyzda jyl saıyn ótkizilip kele jatqan, el arasynda tanylmaı júrgen talaı dástúrli ánshi men ónerpazdyń baǵyn ashqan «Aımaqty ánmen terbetip» án festıvalimen jalǵasty. Bul joly da oǵan Aqtóbe oblysynan ózge, kórshiles oblystardyń eldi mekenderinen kelgen ánshiler men kúıshiler qatysty.
Aqtóbe oblysy