16 qyrkúıek kúni Almaty qalasy Áýezov aýdanyndaǵy Amanjol kóshesiniń jol jabyny opyrylyp qaldy, dep jazady Egemen.kz.
Áýezov aýdany ákimdiginiń málimetinshe, merdiger kompanııa buǵan deıin Amanjol kóshesinde taratý jelileri jobasyn aıasynda aýyzsý jáne káriz ınjenerlik jelilerin júrgizý jumystaryn tolyq aıaqtaǵan. Dese de «QazaqGaz» AQ tapsyrysymen 300 mm dıametrli bolat gaz qubyryn tartý josparyna baılanysty asfaltbeton jamylǵysyn tolyq qalpyna keltirý ýaqytsha keıinge qaldyrylǵan.
Osy jaǵdaıǵa jáne qatty nóserdiń áseri joldyń shógýine jáne jabynnyń búlinýine ákeldi. Sonyń saldarynan jol jabyny opyrylyp, 13 avtokólik zaqymdandy. Qazirgi ýaqytta Amanjol kóshesi jabyldy. Tańerteńnen bastap kólikterdi evakýasııalaý, topyraqty shyǵarý jáne joldy tolyq tazartqanǵa deıin ballast tóseý jumystaryn júrgizý josparlanyp otyr. Sonymen qatar merdiger uıym zaqymdanǵan avtokólikterdiń ıelerine keltirilgen shyǵyndy tolyq óteıdi. Másele Almaty qalasy ákimdiginiń baqylaýynda», dep jazdy Almaty qalasy ákiminiń kommýnıkasııa jáne BAQ-pen jumys boıynsha keńesshisi Ilzat Akchýrın.