Qasym-Jomart Toqaev Dúnıejúzilik daoshylar federasııasynyń tóraǵasy Lı Gýanfý, Qytaı býddashylar qaýymdastyǵy tóraǵasynyń orynbasary Szın Bo jáne QHR Din isteri jónindegi bas basqarmasynyń ákimshilik departamenti bastyǵynyń orynbasary Sýn Veı bastaǵan delegasııany qabyldady, dep habarlaıdy Egemen.kz Aqordanyń baspasóz qyzmetine silteme jasap.
Prezıdent jahandyq órkenıetaralyq dıalogty damytýda Qytaıdyń syndarly ról atqaratynyn, sondaı-aq buǵan Tóraǵa Sı Szınpın zor úles qosqanyn atap ótti.
Memleket basshysy beıbitshilik pen úılesim ıdeıasyn ilgeriletýde býdda jáne dao ilimderiniń orny erekshe ekenin aıtty. Sonymen qatar eki eldiń din isine jaýapty memlekettik organdary arasyndaǵy yntymaqtastyqtyń mańyzyna toqtaldy.
Kezdesý sońynda Qasym-Jomart Toqaev birlesken jumys Qazaqstan men Qytaıdyń máńgi strategııalyq seriktestigin nyǵaıtýǵa, ózara senimdi damytýǵa, beıbitshilik pen kelisimniń ortaq qundylyqtaryn dáripteýge yqpal etetinine senim bildirdi.