Premer-mınıstrdiń birinshi orynbasary Roman Sklıardyń tóraǵalyǵymen Investısııalyq shtabtyń kezekti otyrysy ótti.
Jıyn barysynda agroónerkásip kesheni, farmasevtıka men azyq-túlik ónerkásibi sııaqty birqatar basym saladaǵy ınvestısııalyq bastamalardy júzege asyrýdyń negizgi máseleleri qaraldy. Otyrysqa qatysýshylar Investısııalar týraly kelisimderdiń negizgi sharttaryn bekitti. Olardyń qatarynda Khan Tengri BioPharma, Asyl Sugar, Carlsberg Central Asia, Fabe-Agro kompanııalarynyń, sondaı-aq Túrkistandaǵy maqta ósirý agroónerkásip kesheniniń ınvestısııalyq bastamalary bar.
Farmasevtıka
Khan Tengri BioPharma kompanııasy bıofarmasevtıkalyq preparattar óndiretin zaýyt salý jobasyn júzege asyrady. Investısııa kólemi 103 mlrd teńgeden asatyn bul joba ómirlik mańyzy bar dárilik zattardy óndirý boıynsha ulttyq qýattardy nyǵaıtýǵa 2h3 180-nen astam jumys ornyn ashýǵa múmkindik beredi.
Agroónerkásip kesheni
Agroónerkásip salasynda Asyl Sugar kompanııasy jylyna 200 myń tonnaǵa deıin qant óndirý qýaty bar zamanaýı qant zaýytyn salýdy josparlap otyr. Joba qant qyzylshasyn tereń óńdeýge, ımportty almastyrýǵa ári elimizdiń strategııalyq azyq-túlik ónimderi boıynsha ózin-ózi qamtamasyz etý deńgeıin arttyrýǵa baǵyttalǵan. Jalpy ınvestısııa kólemi – 72 mlrd teńge.
Carlsberg Central Asia óndiristik qýatyn jylyna 340 mln lıtrge deıin ulǵaıta otyryp, sýsyndar óndirisin keńeıtý jobasyn júzege asyrady. Joba aıasynda energııa únemdeıtin tehnologııalar men jańa óndiristik jeliler engiziledi. Bul básekege qabiletti ónim shyǵarý kólemin arttyrýǵa múmkindik beredi. Investısııa kólemi – 216 mlrd teńge.
Fabe-Agro kompanııasy jylyna 38 myń tonna kókónis óńdeý qýaty bar agroónerkásip keshenin qurady. Keshenniń quramyna jem-shóp, ósimdik maılary jáne basqa da ónimder óndirisi kiredi. Bul shıkizatty jergilikti jerde óńdeýdi damytýǵa ári ımportqa táýeldilikti azaıtýǵa yqpal etedi. Investısııa kólemi – 68 mlrd teńge.
Túrkistandaǵy maqta ósirý agroónerkásip kesheni jylyna 121 myń tonna óndiristik qýaty bar maqtany tereń óńdeý jobasyn júzege asyrady. Bul toqyma ónimderine deıingi tolyq sıkldi jolǵa qoıýǵa, jańa jumys oryndaryn ashýǵa jáne jeńil ónerkásiptiń damýyna múmkindik beredi. Jalpy ınvestısııa kólemi – 58 mlrd teńge.
Atalǵan jobalardyń barlyǵy azyq-túlik qaýipsizdigin arttyrýǵa, aýyl sharýashylyǵy ónimderin tereń óńdeýdi damytýǵa, ımportty almastyrýǵa ári qosylǵan quny joǵary ónim shyǵarýǵa baǵyttalǵan.
Tamaq ónerkásibi
Otyrysta osylarǵa qosymsha PepsiCo kompanııasynyń tuzdy jeńil taǵamdar óndirý jobasyn ınfraqurylymmen qamtamasyz etý máselesi qaraldy. Mundaǵy josparlanǵan óndiristik qýat jylyna 70 myń tonna daıyn ónimdi, al ınvestısııa kólemi shamamen 200 mlrd teńgeni quraıdy. Joba azyq-túlik ónimderiniń eksporttyq áleýeti men óndirisin edáýir keńeıtýge, jańa jumys oryndaryn ashýǵa jáne eldiń azyq-túlik ónerkásibin damytýǵa múmkindik beredi.