Memleket basshysy Qasym-Jomart Toqaev Álemdik jáne dástúrli dinder kóshbasshylarynyń VIII cezine qatysý úshin Astanaǵa kelgen mártebeli meımandarmen kezdesý ótkizdi.
Prezıdent aldymen Máskeý jáne búkil Reseı patrıarhy Kırıllmen kezdesti.
Onda Memleket basshysy bul kezdesý Qazaqstan men Reseı arasyndaǵy yntymaqtastyqty tereńdetý jolyndaǵy taǵy bir mańyzdy qadam ekenin atap ótti.
– Eń aldymen, sezge arnaıy kelgenińiz úshin rızashylyǵymdy bildiremin. Sizdiń bul jıynǵa qatysýyńyz, shyn máninde, forýmnyń tabysty ótý turǵysynan mańyzdy. Biz sizdi qurmetteımiz. О́zińizge málim, Qazaqstan men Reseı – strategııalyq seriktes, odaqtas elder, – dedi Prezıdent.
Patrıarh Kırıll Qasym-Jomart Toqaevqa qonaqjaılyq tanytqany úshin alǵys aıtyp, Orys pravoslavıe shirkeýiniń mıssııasy halyqtar arasyndaǵy beıbitshilik pen ózara túsinistikti nyǵaıtý ekenin málimdedi.
– Qasıetti Qazaqstanǵa kelý meni árdaıym qýantady. Bul – bizdiń dostas elimiz. Ǵasyrlar boıy qatar ómir súrip kelemiz. Qazir memleketterimiz bólek bolǵanymen, dostyq, ózara qoldaý jáne yntymaqtastyq tinin berik jalǵap otyrmyz, – dedi Máskeý Patrıarhatynyń basshysy.
Qasym-Jomart Toqaev eki el arasyndaǵy rýhanı baılanystardy nyǵaıtýǵa qosqan úlesi úshin ári aıryqsha qurmet belgisi retinde Máskeý jáne búkil Reseı patrıarhy Kırılldi «Altyn Qyran» ordenimen marapattady.
* * *
Álemdik jáne dástúrli dinder kóshbasshylarynyń VIII sezi alańynda Qasym-Jomart Toqaev Izraıldiń bas ashkenaz ravvıni Kalman Bermen, Izraıldiń bas sefard ravvıni Davıd Iosefpen, Amerıkanyń iri evreı uıymdary prezıdentteri konferensııasy atqarýshy tóraǵasynyń orynbasary Malkolm Honlaınmen kezdesti.
Memleket basshysynyń aıtýynsha, meımandardyń forýmǵa qatysýy elder arasyndaǵy mádenı-rýhanı baılanystardy nyǵaıtýǵa ázir ekenin kórsetedi.
Prezıdent elimizdiń halqy álemniń negizgi dinderin ustanatynyn aıtty. Olardyń arasynda ıýdaızmniń orny erekshe. Al evreı uıymdary qoǵamnyń ajyramas bóligi retinde Qazaqstan halqy Assambleıasyn damytýǵa jáne nyǵaıtýǵa zor úles qosyp keledi.
Qasym-Jomart Toqaev ashkenaz jáne sefard ravvınattarynyń kóshbasshylary adamzatqa ortaq qundylyqtardy ilgeriletý jolyndaǵy dinaralyq dıalogke belsendi atsalysa beretinine senim bildirdi.
* * *
Memleket basshysy Ierýsalım Patrıarhy III Feofılmen kezdesti.
Qasym-Jomart Toqaev Ierýsalım Patrıarhyna iltıpat bildirip, Álemdik jáne dástúrli dinder kóshbasshylarynyń sezine udaıy qoldaý kórsetip kele jatqany úshin alǵys aıtty. Prezıdent Patrıarhtyń jarqyn úndeýi men mazmundy usynystary Astana dinaralyq forýmynyń rólin nyǵaıtýǵa zor úles qosqanyn atap ótti.
Prezıdent qazirgi zamanda din aıryqsha ról atqaratynyna toqtalyp, beıbitshilikti saqtaý jáne dinaralyq qarym-qatynas mádenıetin ilgeriletýde din qaıratkerlerine úlken jaýapkershilik júktelgenin málimdedi.
Memleket basshysy pravoslav dini Qazaqstannyń rýhanı ómirinde mańyzdy oryn alatynyn atap ótip, onyń aǵartýshylyq, bitimgerlik jáne qoǵamdyq mıssııasynyń qundylyǵyna nazar aýdardy.
* * *
Prezıdent BUU Bas hatshysynyń О́rkenıetter alıansy jónindegi joǵary ókili Mıgel Anhel Moratınosty qabyldady.
Qasym-Jomart Toqaev Mıgel Anhel Moratınosty Birikken Ulttar Uıymynyń ıslam fobııasymen kúres jónindegi arnaýly ókili bolyp taǵaıyndalýymen quttyqtady.
Memleket basshysy elimiz órkenıetter, mádenıetter jáne dinder arasyndaǵy ózara túsinistik pen qurmetti ilgeriletýdiń negizgi alańy sanalatyn BUU О́rkenıetter alıansymen yntymaqtastyqqa basa mán beretinin jetkizdi.
Prezıdent Álemdik jáne dástúrli dinder kóshbasshylarynyń sezin ótkizýge turaqty qoldaý bildirip kele jatqan, sondaı-aq forým aıasynda Qazaqstan tarapymen birlesip dinı nysandardy qorǵaý máselelesi boıynsha arnaıy sessııa uıymdastyrǵan alıanstyń qyzmetin joǵary baǵalady.
BUU Bas hatshysynyń joǵary ókili Qazaqstanda júzege asyrylǵan reformalardyń mańyzyn atap ótip, sezd qorytyndysy beıbitshilikti, kelisim men dinaralyq dıalogti nyǵaıtýǵa yqpal etetinine senim bildirdi.
Kezdesý sońynda Qasym-Jomart Toqaev Mıgel Anhel Moratınosty dinaralyq dıalogke qosqan úlesi úshin Astana halyqaralyq syılyǵyn ıelenýimen quttyqtady.
* * *
Qasym-Jomart Toqaev Dúnıejúzilik daoshylar federasııasynyń tóraǵasy Lı Gýanfý, Qytaı býddashylar qaýymdastyǵy tóraǵasynyń orynbasary Szın Bo jáne QHR Din isteri jónindegi bas basqarmasynyń ákimshilik departamenti bastyǵynyń orynbasary Sýn Veı bastaǵan delegasııany qabyldady.
Prezıdent jahandyq órkenıetaralyq dıalogti damytýda Qytaıdyń syndarly ról atqaratynyn, sondaı-aq buǵan Tóraǵa Sı Szınpın zor úles qosqanyn atap ótti. Memleket basshysy beıbitshilik pen úılesim ıdeıasyn ilgeriletýde býdda jáne dao ilimderiniń orny erekshe ekenin aıtty. Sonymen qatar eki eldiń din isine jaýapty memlekettik organdary arasyndaǵy yntymaqtastyqtyń mańyzyna toqtaldy.
Kezdesý sońynda Qasym-Jomart Toqaev birlesken jumys Qazaqstan men Qytaıdyń máńgi strategııalyq seriktestigin nyǵaıtýǵa, ózara senimdi damytýǵa, beıbitshilik pen kelisimniń ortaq qundylyqtaryn dáripteýge yqpal etetinine senim bildirdi.
* * *
Prezıdent Kavkaz musylmandary basqarmasynyń tóraǵasy Sheıh-ýl-ıslam Allashúkir Pashazadeni qabyldady.
Prezıdent dinaralyq dıalogti ilgeriletý, memleketter arasyndaǵy senimdi nyǵaıtý máselelerinde Qazaqstan men Ázerbaıjannyń ustanymdary ortaq ekenine toqtaldy.
Memleket basshysy dinaralyq túsinistikke septigin tıgizetin ózara yqpaldastyq eki eldiń uzaqmerzimdi seriktestigin bekite túsetinine senim bildirdi.
* * *
Memleket basshysy BAÁ ıslam jáne ýaqyptar isteri jónindegi bas basqarmasynyń tóraǵasy Omar Habtýr ál-Dareımen kezdesti.
Prezıdent meımanǵa iltıpat tanytyp, Álemdik jáne dástúrli dinder kóshbasshylarynyń VIII sezine qatysqany úshin rızashylyq bildirdi.
Qasym-Jomart Toqaev pen Omar Habtýr ál-Dareı álemdegi rýhanı ahýal máseleleri jóninde pikir almasyp, dinaralyq dıalogti damytýdyń mańyzyn atap ótti. Sondaı-aq túrli konfessııalar arasynda ózara túsinistik pen úılesimdi nyǵaıtýǵa baǵyttalǵan birlesken kúsh-jigerdiń ózektiligine toqtaldy.