Premer-mınıstr Oljas Bektenov Bishkek qalasynda (Qyrǵyzstan) Qyrǵyz Respýblıkasynyń Prezıdenti Sadyr Japarovtyń Túrki memleketteri uıymyna múshe elder delegasııalarynyń basshylarymen ujymdyq kezdesýine jáne úkimet basshylarynyń, TMU memleketteriniń vıse-prezıdentiniń kezdesýine qatysty, dep jazady Egemen.kz.
Qyrǵyz Respýblıkasynyń Prezıdentimen ujymdyq kezdesý barysynda óńirlik ıntegrasııany, saýda-ekonomıkalyq qatynastardy damytý, tranzıttik áleýetti tıimdi paıdalaný jáne taǵy da basqa máselelerge nazar aýdaryldy.
TMU elderiniń úkimet basshylary men vıse-prezıdentiniń kezdesýine Túrkııa Respýblıkasynyń vıse-prezıdenti Djevdet Iylmaz, Qyrǵyz Respýblıkasy Mınıstrler Kabınetiniń tóraǵasy – Prezıdent Ákimshiliginiń basshysy Adylbek Kasymalıev, Ázerbaıjan Respýblıkasynyń Premer-mınıstri Álı Idaıat oǵly Asadov, О́zbekstan Respýblıkasynyń Premer-mınıstri Abdýlla Arıpov, TMU Bas hatshysy Kýbanychbek О́miralıev qatysty.
Qatysýshylar ekonomıka, saýda, ınvestısııalar, kólik, sıfrlandyrý, energetıka, aýyl sharýashylyǵy salalaryndaǵy ózara is-qımyl týraly pikir almasty. Uıym sheńberinde kópjaqty yntymaqtastyqty nyǵaıtýǵa baǵyttalǵan tetikterdi jetildirý máseleleri talqylandy.
Qazaqstan Premer-mınıstri óz sózinde Memleketter basshylarynyń syndarly saıasaty Uıymnyń strategııalyq negizin qalaýǵa baǵyttalǵan mańyzdy bastamalardy júıeli túrde júzege asyrýǵa múmkindik beretinin atap ótti.
«Qazaqstan Prezıdenti Qasym-Jomart Toqaev atap ótkendeı, Túrki memleketteriniń uıymy qysqa ýaqyt ishinde bedeldi qurylymǵa aınaldy jáne óziniń álem aldyndaǵy mártebesin kóterdi. Búgingi kezdesý nátıjeleri túrki memleketteri arasyndaǵy baýyrlastyq jáne seriktestik qarym-qatynastardyń odan ári damýyna tyń serpin berip, halyqtarymyzdyń múddesine qyzmet etedi dep senemin», dedi Oljas Bektenov.
Jıynda Túrki elderiniń saýda-ónerkásip palatalary odaǵy, Túrki ınvestısııalyq qory, Úılestirý komıteti, «Jasyl» qarjy jónindegi keńes jáne taǵy da basqa osy sııaqty ınstıtýttardyń qyzmetin tıimdi paıdalanýdyń mańyzdylyǵy atap ótildi.
Kólik-logıstıkalyq baılanystardy nyǵaıtýǵa, kedendik rásimderdi sıfrlandyrý qarqynyn jedeldetýge jáne porttar men temir joldardy, onyń ishinde Transkaspıı halyqaralyq kólik baǵytynyń ınfraqurylymyn jańǵyrtýǵa basa nazar aýdaryldy.
Sonymen qatar ǵylymı zertteýler men tájirıbelik-konstrýktorlyq jumystar salasyndaǵy ózara is-qımyldyń, jasandy ıntellekt, kıberqaýipsizdik jáne taǵy da basqalary boıynsha birlesken zertteý ortalyqtaryn qurý jaıy sóz boldy.