«Azamattarǵa arnalǵan úkimet» memlekettik korporasııasy memlekettik qyzmetterdi kórsetý úderisterin jetildirýge jáne zamanaýı tájirıbelerdi engizýge baǵyttalǵan oqytý is-sharalaryn turaqty túrde ótkizip keledi, dep habarlaıdy Egemen.kz.
2025 jyldyń basynan beri korporasııa memlekettik organdardyń qyzmetkerlerine kásibı daǵdylaryn damytýǵa, sapaly ári ashyq memlekettik qyzmet kórsetýge múmkindik beretin birqatar oqytýlardy iske asyrýda.
Atalǵan kezeńde korporasııanyń front-ofısterinde memlekettik organ ókilderiniń qatysýymen 43 oqytý is-sharasy ótkizildi. Bul semınarlar tájirıbe almasýǵa, biryńǵaı jumys standarttaryn qalyptastyrýǵa jáne qyzmet kórsetýdiń jańa tásilderin engizýge yqpal etti.
Sondaı-aq, 4-5 qyrkúıek kúnderi Astanada «Tanym» korporatıvtik oqý ortalyǵy eki kúndik semınar ótkizdi. Baǵdarlama kenes1414 jáne «e-О́tinish» bilim bazalarymen jumys, ishki prosesterdi ońtaılandyrý jáne elektrondyq úkimet portalynyń servısterin paıdalaný máselelerin qamtydy.
Semınarǵa Bas prokýratýranyń Quqyqtyq statıstıka jáne arnaıy esepke alý komıtetiniń ókilderi qatysyp, memlekettik organdardaǵy ótinishterdi tirkeý men esepke alý tártibin túsindirdi. Sonymen qatar, Ádilet mınıstrliginiń mamandary Ákimshilik rásimdik-prosestik kodekstiń qoldanylýy boıynsha túsindirme jumystaryn júrgizdi. Praktıkalyq bólimde qatysýshylar «e-О́tinish» júıesi arqyly azamattardyń ótinishterimen jumys isteýdi úırendi.
Is-shara qorytyndysy boıynsha qatysýshylarǵa «e-О́tinish: azamattardyń ótinishterimen jumys isteý ádistemesi men tájirıbesi» baǵdarlamasyn aıaqtaǵany týraly sertıfıkattar tabystaldy.
Osylaısha, bilim berý baǵdarlamalaryn damytý Memlekettik korporasııa jumysynyń mańyzdy baǵytyna aınalyp otyr. Bul memlekettik qyzmetterdiń sapasyn arttyrýǵa, qyzmetkerlerdiń kásibı damýyna jáne zamanaýı tájirıbelerdi engizýge yqpal etedi.