Almaty qalasynda shahmattan kadetter arasyndaǵy álem chempıonaty resmı túrde ashyldy. Jarys 19–30 qyrkúıek aralyǵynda ótedi, dep jazady Egemen.kz.
Bıylǵy chempıonatqa 88 elden 850-den astam jas shahmatshy tirkeldi. Úndistannan 28, Qytaıdan 25, AQSh-tan 24 oıynshy qatysyp otyr. Qazaqstan chempıonat ıesi retinde 200-den astam sportshyny jarysqa qosty.
Týrnırdi Qazaqstan Respýblıkasynyń Týrızm jáne sport mınıstrligi, Almaty qalasynyń ákimdigi, Halyqaralyq shahmat federasııasy (FIDE) jáne Qazaqstan shahmat federasııasy (KazChess) uıymdastyryp otyr. Ashylý saltanatyna QR Premer-Mınıstriniń orynbasary Ermek Kósherbaev, Almaty qalasynyń ákimi Darhan Satybaldy, FIDE prezıdenti Arkadıı Dvorkovıch jáne KazChess prezıdenti Tımýr Týrlov qatysty.
«Eshbir shahmat týrnıri, tipti elimizdegi ózge sporttyq sharalardyń eshqaısysy da mundaı aýqymdy qatysýshylar quramyn jınamaǵan. Bul – qazaqstandyq shahmat pen tutas elimiz úshin tarıhı sát. Biz qonaqtardy tek qonaqjaı retinde ǵana emes, sonymen qatar álemniń eń myqty shahmat derjavalarynyń biri ári týrnırdiń basty favorıti mártebesinde qarsy alyp otyrmyz», dedi Tımýr Týrlov.
Qazaqstan buǵan deıin de shahmattan eń joǵary deńgeıdegi halyqaralyq jarystardy, sonyń ishinde álem chempıonattary men erler arasyndaǵy álem chempıony ataǵy úshin matchty ótkizgen. О́tken jyly Italııanyń Montesılvano qalasynda ótken chempıonatqa 77 elden 700-den astam sportshy qatyssa, bıylǵy kórsetkish 88 elden 851 oıynshyǵa jetti. Onyń ishinde 231 qazaqstandyq bar.
Ashylý rásiminen keıin alǵashqy týr bastalyp ketti. Jarys shveısar júıesi boıynsha 11 týrdan turady. Ýaqytty baqylaý formaty – 90+30 (ár oıynshyǵa 90 mınýt jáne alǵashqy júristen bastap ár qadamǵa 30 sekýnd qosylady). Qorytyndysy boıynsha álem chempıondary men júldegerler anyqtalady. Jarys uldar (Open) men qyzdar (Girls) arasynda alty jas sanatynda ótip jatyr: O8, G8, O10, G10, O12 jáne G12.
25 qyrkúıek demalys kúni bolyp belgilengen. Bul kúni jas sportshylar úshin mádenı-sporttyq baǵdarlama uıymdastyrylady. Olar Shymbulaq taý-shańǵy kýrortyna ekskýrsııaǵa baryp, sheshim shyǵarý boıynsha álem chempıonatyna jáne júlde qory 2000 AQSh dollaryn quraıtyn blıs-týrnırge qatysady.
Sonymen qatar 27–28 qyrkúıekte Satbayev University-de «Bilim berýdegi shahmat» atty III Halyqaralyq konferensııa ótedi. Jıynǵa FIDE-niń «Chess in education» komıssııasynyń tóraǵasy, AQSh ókili Djerrı Nesh qatysady.