Týrızm jáne sport mınıstrliginiń habarlaýynsha, 2025 jyldyń alǵashqy segiz aıynda sportshylarymyz halyqaralyq arenalarda 912 medal ıelendi. Onyń ishinde 351-i altyn, 270-i kúmis, 291-i qola, dep jazady Egemen.kz.
Aıtýynsha, mundaı jetistikke memlekettiń júıeli qoldaýy, jattyqtyrýshylardyń eńbegi jáne sport federasııalarynyń úılesimdi jumysy yqpal etti. Sondaı-aq ulttyq quramalarǵa sheteldik mamandardyń kelýi men jańa ádistemelerdiń engizilýi de mańyzdy ról atqardy.
Bıylǵy tarıhı jeńisterdiń qatarynda qysqy Azııa oıyndaryndaǵy alǵashqy altyndar, semserlesýden álem chempıonatyndaǵy alǵashqy júlde, kórkem gımnastıkadan jasóspirimder arasyndaǵy álem chempıonatyndaǵy altyn, áıelder dzıýdosyndaǵy tuńǵysh fınal, bokstan World Boxing aıasyndaǵy jalpykomandalyq jeńis, mánerlep syrǵanaýdan álem chempıonatyndaǵy kúmis medal jáne para bıatlondaǵy Hrýstal globýs bar.
Komandalyq sport túrlerinde de tabys mol boldy. «Qaırat» fýtbol klýby alǵash ret Chempıondar lıgasynyń negizgi kezeńine joldama aldy. Al fýtzaldan «Qaırat» ÝEFA Chempıondar lıgasynda kúmis júldeger atandy.
Osy kórsetkishter el sportynyń qarqyndy damyp kele jatqanyn aıqyn dáleldeıdi. Alda Mılan-2026 qysqy Olımpıadasy tur. Sarapshylardyń aıtýynsha, keıingi aılardaǵy jeńister ulttyq quramanyń áleýetin kúsheıtip, eldiń álemdik sporttaǵy bedelin odan ári arttyra túspek.