ASTANA. 8 mamyr. Elbasy «Otan qorǵaýshylar» monýmentine gúl shoǵyn qoıý rásimine qatysty. Bul týraly akorda.kz habarlady.
On myńǵa jýyq adam qatysqan rásim barysynda Uly Otan soǵysy kezinde urys dalasynda qaza tapqan sarbazdardy bir mınýttyq únsizdikpen eske alý sharasy ótti.
Memleket basshysy monýmentke gúl qoıǵannan soń soǵys jáne eńbek ardagerlerimen áńgimelesti.
Elbasy barsha qazaqstandyqtardy Jeńis kúnimen quttyqtady.
«Bul soǵysqa kóp el qatysty, mıllıondaǵan adamdar maıdan dalasynda qaza tapty jáne sonshasy jaraqat aldy, jaqyndary japa shekti. Biz – jeńimpaz ákelerdiń baqytty urpaǵymyz. Eger olar jeńiske jetpegende, qazir bizdiń jaǵdaıymyz qandaı bolaryn elestetýdiń ózi qıyn. Sondyqtan ardagerlerimiz merekede ǵana emes, kúndelikti ómirde de barlyq qurmetke laıyq. Men jastardyń olarǵa árdaıym kómekteskenin, qart ata-analaryn qurmettegenin qalaımyn, bizdiń halyq solaı bolýǵa tıis. Ardagerler aramyzda aman-esen uzaq júrip, adamgershilik, moraldyq ustanymdarymen jas býynǵa úlgi bola bersin. Merekelerińizben, qymbatty qazaqstandyqtar! Árbir otbasyǵa baqyt, tabys jáne ashyq aspan tileımin!», – dedi Nursultan Nazarbaev.
Elaman Qońyr.
Derek, sýret: akorda.kz.