Bıyl múgedektik pen asyraýshysynan aıyrylý jaǵdaıyna baılanysty azamattarǵa járdemaqy tóleýge respýblıkalyq bıýdjetten 436,1 mlrd teńge bólingen. Buǵan qosa, Memlekettik áleýmettik saqtandyrý qory eńbekke qabilettiliginen aıyrylǵan jáne asyraýshysynan aıyrylǵandarǵa 59,8 mlrd teńgege jýyq qarjy tólegen, dep habarlaıdy Egemen.kz.
Eńbek jáne halyqty áleýmettik qorǵaý mınıstrliginiń málimetinshe, 1 qyrkúıektegi jaǵdaı boıynsha, múgedektigi úshin memlekettik áleýmettik járdemaqy alýshylar sany 543,7 myń adamǵa jetken. Al asyraýshysynan aıyrylǵandarǵa tólenetin járdemaqyny 184,1 myńǵa jýyq adam alyp otyr.
Sonymen qatar, mindetti áleýmettik saqtandyrý júıesine qatysýshylar da qordan qoldaý alyp otyr. 2025 jyldyń qyrkúıegine deıin 97 myń adam eńbekke jaramsyzdyqqa baılanysty tólem alsa, 65,9 myń otbasy asyraýshysynan aıyrylǵany úshin áleýmettik tólemdermen qamtylǵan.
Esterińizge sala keteıik, múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady. Al asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty.