Dúnıeni tanýdyń tarmaǵy kóp, sonyń biri – áýen arqyly álemge úńilý. Hakim Abaıdyń ǵalamsharyna bul joly mýzyka kemesiniń zertteýshileri kelip qondy. Fransýzdyń kórnekti kompozıtory Per Tıllýa «Abaı armany» atty shyǵarma jazyp, aqyn áleminiń kórkemdik keńistigine boılady. Saz baqshasy men sóz patshasynyń úılesimi «Qazaqkonsert» sahnasynda kórinis tapty.
Birneshe jyl buryn belgili pıanıst, elimizdiń eńbek sińirgen qaıratkeri Tımýr Ýrmancheevtiń yjdaǵatymen «FORTE TRIO» ansambli quryldy. Skrıpka, vıolonchel jáne fortepıanonyń úndestigimen alǵashqy mýzykalyq ujym jasaqtaldy. Shyǵarmashylyq top álemdik sahnalarda óner kórsetip, kórermen yqylasyna bólene berdi. Sondaı gastroldik sapar aıasynda «FORTE TRIO» Fransııanyń Mıýlýz qalasynda boldy. Bul týrasynda ujym jetekshisi Tımýr Ýrmancheev bylaı dep aıtady:
«Bul qalada álemge áıgili kompozıtor Per Tıllýa turatyn. Ol bizdiń konsertimizge kelip, tańdanysyn jetkizdi. Qazaqstandaǵy klassıkalyq mýzyka deńgeıine joǵary baǵa berdi. Sol sátten bastap biz tyǵyz shyǵarmashylyq baılanys ornattyq. Ol trıomyz arqyly Uly Dalanyń áýen álemimen tanysa bastady. Halyq shyǵarmalary men halyq kompozıtorlarynyń murasyn zerdeleı tústi. Izdenis izimen júrip ultymyzdyń ulyq danasy Hakim Abaı álemine tap keldi. Onyń san qyrly bolmysy, bıiktigi men tereńdigi kompozıtor sanasyna jańasha sáýle túsirdi», deıdi T. Ýrmancheev. Onyń aıtýynsha, batys álemi úshin shyǵys álimsaqtan qyzyq hám ǵajaıyp meken. Per Tıllýa da Abaıdyń ómir muratyna, kózqaras ereksheligine ańsar qylyp, arnaıy trıoǵa arnap «Abaı armany» atty shyǵarmany jazyp shyqqan.
Buǵan deıin týyndy Eýropanyń birneshe shahary men Reseıdiń Krasnoıarsk qalasynda oryndaldy. Avstrııalyq dırejer Marııa Benıýmova: «bul qalalardaǵy gastrolder hakimniń týǵan eline daıyndyq dep esepteımiz. Oıshyldyń 180 jyldyq mereıtoıyna tartýymyz dep bilemiz», dedi ol.
Roza Baǵlanova atyndaǵy «Qazaqkonsert» uıymynyń basshysy Altaır Qojahmetov konserttik ujym Abaı toıyna jańa izdenispen kelgenin jetkizdi. «Konserttik ujym hakim murasyn dástúrli, estradalyq jáne klassıkalyq baǵytta nasıhattaýdy maqsat etedi. Bul adamdardyń mýzykalyq talǵamyna saı Abaıdy jan-jaqty tanystyrýǵa múmkindik beredi. Buǵan qosa aqynnyń shyǵarmashylyq zerthanasyn keshendi tanytý úshin, arnaýly dáris-konsertter ótip turady», dedi A.Qojahmetov.