Otandyq zertteýshiler júrek-qan tamyrlary aýrýynyń aldyn alýǵa arnalǵan platforma jasap shyǵardy. Ál-Farabı atyndaǵy Qazaq ulttyq ýnıversıtetiniń ǵalymdary ázirlegen «Zhurek AI» platformasy derttiń qaýiptiligin erte anyqtaýǵa múmkindik beredi, dep habarlaıdy Egemen.kz.
Jasandy ıntellekt kómegimen jumys isteıtin platforma adamnyń júrek-qan tamyrlary júıesindegi aýytqýlardy der kezinde anyqtap, onyń qaýiptilik deńgeıin avtomatty túrde baǵalaı alady. Sondaı-aq medısına qyzmetkerleriniń jumysyn jeńildetýge septigin tıgizedi.
Ǵylym jáne joǵary bilim mınıstrligi taratqan aqparatyna súıensek, paıdalanýshy platformaǵa PDF formatyndaǵy qan taldaýynyń nátıjesin júktep, arnaıy daıyndalǵan saýalnamadan ótedi. Keıin júıe barlyq aqparatty jyldam óńdep, táýekelderdi shyǵaryp beredi. Nátıje qorytyndysynda adam ómirine qaýipti jaǵdaı bolsa, naýqasqa birden dárigerge júginý usynylady.
Platforma jumysy kúrdeli algorıtmnen turady. Ol dıagnostıkanyń jáne táýekelderdi jikteýdiń joǵary dáldigin qamtamasyz etetin tereń neırondyq jeliler (DNNs) men úlken tirek vektorlarynyń ádisinen (Large-margin SVMs) turady.
QazUÝ bazasyndaǵy Jasandy ıntellekt jáne zattar ınterneti zerthanasynyń ǵylymı qyzmetkeri Ásııa Baltabaeva: «Atalǵan jobanyń basty artyqshylyǵy – jyldamdyǵynda. Ekinshiden, dáldiginde. «Zhurek AI» myńdaǵan naqty medısınalyq derekter negizinde ázirlendi, sondyqtan ol keıde dárigerler baıqamaı qalatyn jasyryn aýytqýlardy da kóre alady. Bul erte dıagnostıka úshin óte mańyzdy», deıdi.
Jobany Ǵylym jáne joǵary bilim mınıstrligi qarjylandyrady. Innovasııalyq platformany QazUÝ 15 ǵalymy birlesip ázirledi. Bolashaqta mamandar júıeni tolyq iske qosyp, ári qaraı kommersııalandyrýdy josparlap otyr.