Tárbıe basy – tazalyq

Qazir jurtshylyq jıi-jıi uıymdastyrylatyn sen­­bilik­terge boı úıretip keledi. Bas­­tapqyda «Qyzylordanyń jeli búgin jınaǵanyńdy er­teń shashady, bizdiki osy ne áýre?» degender de tabylmaı qalǵan joq. Biraq júıe­li uıym­dastyrylǵan is bul se­kemdi de seıiltti. Jınalǵan qoqys arnaıy orynǵa jedel jetkizilgeni bul istiń kóz aldaý úshin jasalmaǵanyn kór­setip, muntazdaı kósheler men jınaqy baqtar men gúl­zar­lar tárbıe men tártip basy tazalyq ekenin dáleldeı tústi.

Oblys ortalyǵyndaǵy «Otan qorǵaýshylar» alleıasynda «Taza Qazaqstan – taza aımaq» atty ekologııalyq aksııa ótip, oǵan belsendi jastar, eriktiler, «Ama­nat» partııasy janyndaǵy «Jas­tar rýhy» jastar qanaty men oblystyq, qalalyq jastar re­sýrstyq or­talyqtarynyń ókil­deri qatys­ty. Aksııa aıasynda elýge jýyq jas alleıa aýmaǵyn qoqystan, qurǵaq butaqtar men tús­ken japyraqtardan tazartty.

«Ortaq iske úles qosqandar kóp. Jurtty jaqsy­lyq­qa jumyldyrǵan mundaı basta­malardyń óske­leń urpaqty tabıǵatty aıalaý­ǵa tárbıeleýdegi mańyzy erek­she», deıdi oblys­tyq Jastar resýrstyq ortaly­ǵynyń dırektory Álibı Basarov.

Bul kúni qaladaǵy Saıahat shaǵyn aýdanynda da senbilik uıymdastyrylyp, jaýapty sala ókilderinen bólek, mańaı tur­ǵyndary da ortaq iske jumyldy. 

Qaladaǵy Densaýlyq jáne demalys saıabaǵynda da keń kólemdi senbilik uıym­das­tyryldy. Ob­lys­tyq bas­qarmalar men mekeme­ler­d­iń qyzmetkerleri, jas­tar uıymdarynyń belsen­dileri, eriktiler, sondaı-aq qala turǵyndary qatysqan senbilik barysynda saıabaq aýmaǵyndaǵy qoqys jına­lyp, aǵashtardyń túbi qopsy­tylyp, jasyl jelek sýa­ryldy. Jańadan jas kóshetter otyrǵyzylyp, gúlzarlar retke keltirildi. Osyn­daı bastamalar barlyq aýdanda uıymdastyrylyp, jol jıekteri men jaıaý júr­ginshiler joldary, qoǵamdyq oryndar tazartylyp, retsiz ósken shópter shabylyp, qýraǵan butaqtar kesildi.

Jastar belsendileri sen­bilik kezinde ekologııalyq mádenıetti keńinen sóz etip, tabıǵatty qorǵaýdyń mańyz­dylyǵyn túsindirip júr. Olar jurtshylyq arasynda qorshaǵan ortanyń tazalyǵyn saqtaý ár azamattyń mindeti ekenin, mun­daı is-sharalar tek senbilik kún­deri ǵana emes, kúndelikti ádet­ke aınalýy kerektigin nasıhattaıdy.

QYZYLORDA